న్యూఢిల్లీ: లోక్సభ ఎన్నికల ప్రచారానికి బీజేపీ హైకమాండ్ సిద్ధమవుతోంది. ఈ నెల 13న బీహార్ లో పర్యటించనున్న ప్రధాని మోదీతో ప్రచారానికి శ్రీకారం చుట్టించేందుకు ఏర్పాట్లు చేస్తోంది. చంపారన్ పర్యటనలో ప్రధాని మోదీ పలు అభివృద్ధి పనులకు శంకుస్థాపనలు చేయనున్నారు. రోడ్లు, బ్రిడ్జిల నిర్మాణానికి భారీగా నిధులు కేటాయించనున్నారు. ఆ తర్వాత బెట్టయ్య సిటీలో భారీ ర్యాలీతో లోక్ సభ ఎన్నికల ప్రచారం ప్రారంభించేలా ప్రణాళికలు సిద్ధం చేస్తున్నారు. బీహార్లోని మొత్తం 40 స్థానాలను గెల్చుకోవడమే లక్ష్యంగా ప్రచార షెడ్యూల్ రూపొందిస్తున్నారు. బహిరంగ సభలతో పాటు రోడ్ షో, ర్యాలీలు నిర్వహించేందుకు రాష్ట్ర నాయకులు ఏర్పాట్లు చేస్తున్నారు. జనవరి, ఫిబ్రవరిలో మోదీతో పాటు హోంమంత్రి అమిత్ షా, పార్టీ జాతీయ అధ్యక్షుడు జేపీ నడ్డాలతో ప్రచారం నిర్వహించనున్నట్లు బీజేపీ బీహార్ నేతలు చెబుతున్నారు. బెగుసరాయ్, బెట్టయ్య, ఔరంగాబాద్లో నిర్వహించే ర్యాలీల్లో మోదీతో పాటు కీలక నేతలు ర్యాలీలలో పాల్గొంటారని చెప్పారు.
బీహార్పై బీజేపీ స్పెషల్ ఫోకస్
జనవరి, ఫిబ్రవరిలో సితామరాహి, మాధేపురా, నలందలో నిర్వహించే భారీ బహిరంగ సభల్లో అమిత్ షా పాల్గొంటారు. జేపీ నడ్డా కూడా రాష్ట్రంలోని పలు ప్రాంతాల్లో చేపట్టే ఎన్నికల ప్రచారానికి హాజరవుతారు. ప్రధానంగా సీమాంచల్, బీహార్లోని ఈస్ట్రన్ రీజియన్పై నడ్డా ఫోకస్ పెట్టనున్నారు. ప్రస్తుతం జేడీయూ నేతృత్వంలోని సంకీర్ణ ప్రభుత్వం బీహార్లో అధికారంలో ఉంది. మహాఘట్ బంధన్ ప్రభుత్వంలో ఒకప్పుడు బీజేపీతో కలిసి జేడీయూ ప్రభుత్వాన్ని ఏర్పాటు చేసింది. తర్వాత ఎన్డీఏ నుంచి బయటికొచ్చిన జేడీయూ.. ఆర్జేడీతో కలిసి సర్కార్ ఏర్పాటు చేసింది. బీజేపీని గద్దె దించాలన్న లక్ష్యంతో దేశవ్యాప్తంగా ఉన్న పలు పార్టీలు ఇండియా కూటమిని ఏర్పాటు చేశాయి. కూటమి ఏర్పాటులో నితీశ్ కుమార్ కీలక పాత్ర పోషించారు. 2019 లోక్సభ ఎన్నికల్లో బీజేపీ బీహార్లోని మొత్తం 40 స్థానాలకు 39 సీట్లను గెల్చుకుంది. ఈసారి 40 స్థానాల్లో గెలుపే లక్ష్యంగా బీజేపీ వ్యూహం రచిస్తున్నది.
