వాతావరణం చల్లగ ఉందంటే... ఇంట్లో నుంచి బయటకు పోడానికి జంకుతారు చాలామంది. దానికి మంచు తోడయితే.... అడుగుకూడా కదపరు. కానీ, సాహసయాత్రల్ని ఇష్టపడే ప్రీత్ చండీ మాత్రం మైనస్ 50 డిగ్రీల చలిలో, గంటకు 60 కిలోమీటర్ల వేగంతో గాలులు వీచే సౌత్పోల్కు వెళ్లింది. అది కూడా ఒంటరిగా.
బ్రిటిష్ సిఖ్ ఆర్మీ ఆఫీసర్గా పనిచేస్తోంది ప్రీత్. సౌత్పోల్ టూర్కు వెళ్లిన మహిళగా హిస్టరీ క్రియేట్ చేసిన ఈమె భారత సంతతికి చెందింది. ఆమె పంజాబీ సిఖ్ యువతి ‘‘ఈ అడ్వెంచరస్ ట్రిప్ ఎందుకని అడిగితే... ‘జీవితంలో ఏదీ సాధించలేమని అనుకునేవాళ్లలో ధైర్యం నింపడం కోసం. అసాధ్యం అనేది లేదని చెప్పడం కోసం’ అంటున్న ఆమె అడ్వెంచరస్ జర్నీ గురించి...
‘‘దక్షిణ ధృవం(సౌత్ పోల్)లో మంచు కురిసే చోటుకి వెళ్లడం అనేది చాలా ఎమోషనల్గా అనిపించింది. ఇప్పుడు తలచుకుంటే అదంతా ఒక కలలా అనిపిస్తోంది”అంటూ తన సంతోషాన్ని బ్లాగ్లో రాసుకుంది ప్రీత్ చండీ. పోయిన ఏడాది నవంబర్1వ తారీఖున ఆమె అడ్వంచరస్ జర్నీ మొదలైంది. అంటార్కిటికా మంచు ఖండం గుండా ఒంటరిగా స్కైయింగ్ చేస్తూ వెళ్లింది. 1,126 కిలోమీటర్లు ట్రావెల్ చేసి ఈ జనవరి 3న సౌత్పోల్కు చేరుకుంది. తన అడ్వెంచరస్ ట్రిప్ సంగతుల్ని ఏరోజుకారోజు వాయిస్ బ్లాగ్లో చెప్తుండేది.
రెండేండ్ల ప్రాక్టీస్
లండన్లోని క్వీన్ మేరీ యూనివర్సిటీలో స్పోర్ట్స్, ఎక్సర్సైజ్ మెడిసిన్లో డిగ్రీ చదివింది ప్రీత్. తర్వాత ఫిజియోథెరపిస్ట్గా ట్రైనింగ్ తీసుకుంది. ప్రస్తుతం బ్రిటీష్ ఆర్మీలోని వైద్య సిబ్బందికి క్లినికల్ ట్రైనింగ్ ఆఫీసర్గా పనిచేస్తోంది. ఈమధ్యే సౌత్ సూడాన్లో ఐక్యరాజ్యసమితి శాంతి దళంలో ఆరునెలలు పనిచేసింది కూడా. అడ్వెంచర్ టూర్లని ఇష్టపడే ప్రీత్ అసాధ్యం అనేది ఏదీ లేదని నమ్ముతుంది. తాను నమ్మడమే కాదు భయంతో ఏదీ సాధించలేని వాళ్లలో ధైర్యం నింపాలనుకుంది. అందుకోసం అంటార్కిటికాలో ఉన్న సౌత్పోల్కు వెళ్లాలనుకుంది. నిజానికి అది అడ్వెంచరస్ జర్నీ. అందుకని ఫిజికల్గా ఫిట్గా ఉండటం కోసం అంటార్కిటికాలో పెద్ద స్లెడ్జ్ ని లాక్కెళ్లడం ప్రాక్టీస్ చేసింది. 90 కిలోల బరువున్న ఆ స్లెడ్జ్ మీద తన ట్రావెల్ కిట్, ఫుడ్, ఫ్యూయెల్ పెట్టుకుని, దాన్ని లాక్కెళ్లుతూ నడవడం అలవాటు చేసుకుంది. ఆల్ఫ్స్ పర్వతాల్లో పెద్ద పెద్ద మంచు గుట్టల మీద పట్టు జారకుండా నడవడం నేర్చుకుంది. ఐస్లాండ్లో ట్రెక్కింగ్ చేయడమే కాదు గ్రీన్లాండ్, నార్వేలో సాహసయాత్రల్లో ట్రైనింగ్ తీసుకుంది. ఇలా దాదాపు రెండున్నరేండ్లు కష్టపడి సౌత్పోల్ జర్నీకి రెడీ అయింది.
ఎంకరేజ్ చేయడం కోసమే...
‘‘ఈ భూమ్మీద అత్యంత చల్లగా, అత్యంత పొడిగా ఉండే, బలమైన గాలులు వీచే ప్రాంతం అంటార్కిటికా. ఈ అడ్వెంచరస్ ట్రిప్ ప్లాన్ చేయడానికి ముందు నాకు అంటార్కిటికా గురించి చాలా తక్కువ తెలుసు. ఈ ప్రాంతం గురించి తెలుసుకోవాలనే క్యూరియాసిటీతో ట్రిప్కు వెళ్లాను. ఏ పనీ అసాధ్యం కాదని నమ్మే నేను అందరికీ రోల్మోడల్గా ఉండే పనిచేయాలని ఎప్పుడూ అనుకునేదాన్ని. ఎంత పెద్ద లక్ష్యమైనా మొదట్లో అసాధ్యంగానే కనిపిస్తుంది. అయితే, ట్రైనింగ్ ముగిసే టైంకి నా గోల్కి మరింత దగ్గరైనట్టు అనిపించింది. ఈ సాహసయాత్ర నా ఒక్కదానికోసమే కాదు చాలామందికోసం. భయాల్ని వదిలి, తమని తాము నమ్మేలా ఎంకరేజ్ చేయాలనేది నా కోరిక. జీవితంలో ఏదైనా సాధించేందుకు బోలెడు అవకాశాలు ఉంటాయని ఈ జనరే షన్ పిల్లలు తెలుసుకోవాలి” అంటూ తన సౌత్పోల్ జర్నీ గురించి చెప్పింది ప్రీత్.
