భద్రాచలం, వెలుగు: భూత వైద్యం వికటించి ఆరు నెలల గర్భిణి చనిపోయింది. భద్రాచలం ఏజెన్సీ బార్డర్లోని ఛత్తీస్గఢ్ రాష్ట్రం సుక్మా జిల్లా కుంట బ్లాక్ మారాయిగూడెం గ్రామానికి చెందిన కురసం హెన్కి గొంతు వాపుతో బాధపడుతోంది. ఆమెను కుటుంబ సభ్యులు అదే గ్రామంలోని ఓ భూతవైద్యుడి వద్దకు తీసుకెళ్లారు. అతను ఆమె గొంతును బలంగా కొరికి వైద్యం చేయడంతో ఇన్ఫెక్షన్ సోకి శ్వాస తీసుకోవడంలో ఇబ్బందులు తలెత్తాయి.
దీంతో ఈ నెల 14న భద్రాచలం ఏరియా ఆసుపత్రికి ఆమెను తీసుకొచ్చారు. ఆసుపత్రి సూపరింటెండెంట్ డా.రాజశేఖర్రెడ్డి ఆధ్వర్యంలో వైద్య సిబ్బంది ఐసీయూలో చేర్చి కృత్రిమ శ్వాసను అందించి చికిత్స అందించారు. చికిత్స పొందుతూ పరిస్థితి విషమించడంతో గురువారం అర్ధరాత్రి దాటాక హెన్కి చనిపోయింది. సదరు భూత వైద్యుడిని కఠినంగా శిక్షించాలని స్థానికులు డిమాండ్ చేస్తున్నారు.
