డెహ్రాడూన్:పాట పాడుతూ అంధ విద్యార్థులు తనకు బర్త్ డే విషెస్ చెప్పడంతో రాష్ట్రపతి ద్రౌపది ముర్ము చలించిపోయారు. భావోద్వేగాన్ని ఆపుకోలేక కన్నీరు పెట్టుకున్నారు. శుక్రవారం ముర్ము 67వ జన్మదినం. ఈ సందర్భంగా ఉత్తరాఖండ్లోని డెహ్రాడూన్ నేషనల్ ఇన్ స్టిట్యూట్ ఫర్ ది ఎంపవర్మెంట్ ఆఫ్ పర్సన్స్ విత్ విజువల్ డిజేబిలిటీస్ (ఎన్ఐఈపీవీడీ) కేంద్రానికి రాష్ట్రపతి వెళ్లారు. అక్కడ అంధ విద్యా ర్థులతో కాసేపు ముచ్చటించారు. తర్వాత విద్యార్థులు ఆమెకు జన్మదిన శుభాకాంక్షలు చెప్తూ పాట పాడడంతో ముర్ము భావోద్వేగానికి గురయ్యారు.
ఈ సందర్భంగా ఆమె మాట్లాడుతూ.. విద్యార్థులు ఎంతో చక్కగా పాడి తనకు జన్మదిన శుభాకాంక్షలు చెప్పారని, దీంతో భావోద్వేగాన్ని ఆపుకోలేకపోయానని తెలిపారు. పుట్టుకతోనే అంధులైన అలాంటి వారిలో ప్రత్యేక సామర్థ్యాలు ఉంటాయని తాను నమ్ముతానని, ఆ విద్యార్థులను చూస్తే, తన నమ్మకానికి బలం చేకూరుతోందని చెప్పారు. విద్యార్థులు నమ్మకంతో ముందుకు సాగితే విజయం తప్పక సిద్ధిస్తుందన్నారు. అంధ విద్యార్థులకు రాష్ట్ర ప్రభుత్వం ఎన్నో అవకాశాలు కల్పిస్తున్నదని, ఆ అవకాశాలను సద్వినియోగం చేసుకోవాలని సూచించారు. అలాగే, బాగా చదువుకొని జాతి నిర్మాణానికి కృషి చేయాలన్నారు.
