- ప్రభుత్వానికి సహకరిస్తమని వెల్లడి
- వెల్లోకి రాబోమనే హామీ ఇస్తే సరేనన్న మంత్రి జోషి
- అన్ని అంశాలపైనా చర్చకు సిద్దమని ప్రకటన
న్యూఢిల్లీ: కాంగ్రెస్ సభ్యులపై విధించిన సస్పెన్షన్ను ఎత్తేయాలని లోక్సభలో ప్రతిపక్షాలు బుధవారం డిమాండ్ చేశాయి. సభ సజావుగా సాగేందుకు ప్రభుత్వానికి సహకరిస్తామని వెల్లడించాయి. కాంగ్రెస్ పార్టీకి చెందిన నలుగురు ఎంపీలను తిరిగి సభలోకి అనుమతించాలని కోరాయి. నేషనలిస్ట్ కాంగ్రెస్ పార్టీ(ఎన్సీపీ), తృణమూల్ కాంగ్రెస్(టీఎంసీ), ద్రవిడ మున్నేట్ర కజగం(డీఎంకే) ఎంపీలు ఈ డిమాండ్ చేశారు. ఉభయ సభల్లోనూ ఆందోళనలు కొత్తేమీ కాదని, ప్లకార్డులు గతంలోనూ ప్రదర్శించారని గుర్తుచేశారు. అయితే, మరోసారి వెల్లోకి వెళ్లబోమని, సభలో ప్లకార్డులు తీసుకురాబోమని హామీ ఇస్తే స్పీకర్ అనుమతితో ఎంపీలపై సస్పెన్షన్ ఎత్తేయడానికి అభ్యంతరంలేదని పార్లమెంటరీ వ్యవహారాల మంత్రి ప్రహ్లాద్ జోషి చెప్పారు. ఆ ఎంపీల ప్రవర్తనకు కాంగ్రెస్తో పాటు మిగతా ప్రతిపక్షాలు బాధ్యత తీసుకుంటామని హామీ ఇవ్వాలని స్పష్టంచేశారు.
రెండుసార్లు వాయిదా తర్వాత..
బుధవారం ఉదయం సభ ప్రారంభమైన తర్వా త ధరల పెరుగుదల, జీఎస్టీ పెంపు తదితర అంశాలపై లోక్సభలో ప్రతిపక్షాలు ఆందోళన చేశాయి. విజయ్ చౌక్లో ఆందోళన సందర్భంగా మంగళవారం కొందరు ఎంపీలు అరెస్టు కావడంతో కాంగ్రెస్ పార్టీకి చెందిన మిగతా ఎంపీలు కూడా సభకు హాజరు కాలేదు. పలువురు సభ్యులు ప్రభుత్వానికి వ్యతిరేకంగా నినాదాలు చేశారు. సభలో గందరగోళం నెలకొనడంతో స్పీకర్ సభను రెండుసార్లు వాయిదా వేశారు. మధ్యాహ్నం 2 గంటలకు సభ తిరిగి సమావేశమైన తర్వాత ఎన్సీపీ ఎంపీ సుప్రియా సూలె మాట్లాడారు. కాంగ్రెస్ ఎంపీలపై విధించిన సస్పెన్షన్ ఎత్తేయాలని ప్రతిపక్షాల తరఫున కోరుతున్నట్లు చెప్పారు. సభ్యుల సస్పెన్షన్ ఎత్తివేస్తే ధరల పెరుగుదలపైన ప్రభుత్వం చేపట్టే చర్చలో పాల్గొనేందుకు ఎదురుచూస్తున్నామని టీఎంసీ ఎంపీ సుదీప్ బంద్యోపాధ్యాయ చెప్పారు. సభలో మంగళవారం జరిగిన సంఘటనలు ప్రజాస్వామ్యానికి మంచివి కావని డీఎంకే ఎంపీ ఏ.రాజా అన్నారు.
రాజ్యసభలో అదే సీన్.. ఆప్ఎంపీపై వేటు
బుధవారం కూడా రాజ్యసభ సజావుగా జరగలేదు. మంగళవారం 19 మంది ఎంపీలపై సస్పెన్షన్ వేటు పడగా, బుధవారం మరో ఎంపీ సస్పెన్షన్కు గురయ్యారు. ఈ వారం మొత్తం ఈ 20 మంది ఎంపీలు సభకు హాజరయ్యేందుకు వీలులేదు. దేశంలో ధరల పెరుగుదలపై వెంటనే చర్చ జరగాలంటూ ప్రతిపక్షాల సభ్యులు పట్టుబట్టారు. దీంతో సభ పలుమార్లు వాయిదా పడింది. ఆప్ ఎంపీ సంజయ్ సింగ్ను డిప్యూటీ చైర్మన్ హరివంశ్ సస్పెండ్ చేశారు. మధ్యాహ్నం సభ ప్రారంభమైనప్పటికీ ఆందోళనలు కొనసాగడంతో సభ గురువారానికి వాయిదా పడింది.
