మాస్కో : రష్యా జనాభాను పెంచడం కోసం ఒక్కో మహిళ 8 మంది పిల్లలను కనాలని ఆ దేశ ప్రెసిడెంట్ వ్లాదిమిర్ పుతిన్ పిలుపునిచ్చారు. అంతకుమించి కంటే ఇంకా మంచిదని ఆయన చెప్పారు. మంగళవారం మాస్కోలో జరిగిన వరల్డ్ రష్యన్ పీపుల్స్ కౌన్సిల్లో పుతిన్ మాట్లాడారు. పూర్వ కాలంలో ఒక్కో ఇంట్లో ఏడెనిమిది కంటే ఎక్కువ మంది సంతానం ఉండేదని, ఇప్పుడు ఆ సంప్రదాయాన్ని కాపాడాలని విజ్ఞప్తి చేశారు. కాగా, 2023 జనవరి నాటికి రష్యా జనాభా 14 కోట్ల 64 లక్షలుగా ఉంది.
అయితే,1990 నుంచే ఆ దేశ జనాభా క్రమంగా తగ్గుతూ వస్తోంది. తాజాగా ఉక్రెయిన్పై యుద్ధం మొదలు పెట్టినప్పటినుంచి రష్యన్ సోల్జర్లు 3 లక్షల మందికి పైగా చనిపోయినట్లు నివేదికలు వెల్లడిస్తున్నాయి. దాంతో పాటు విదేశాలు పెట్టిన ఆంక్షల కారణంగా రష్యాలో పెద్ద మొత్తంలో కార్మికుల కొరత ఏర్పడింది. దీంతో ఆర్థిక వ్యవస్థ అతలాకుతలం అయింది.
