బోధన్, వెలుగు: కేంద్రప్రభుత్వం తీసుకొచ్చిన నూతన జాతీయ విద్యా విధానాన్ని రద్దు చేయాలని పీడీఎస్యూ జిల్లా అధ్యక్షుడు ఆర్.గౌతమ్ కుమార్ డిమాండ్ చేశారు. వామపక్ష విద్యార్థి సంఘాల ఆధ్వర్యంలో దేశవ్యాప్తంగా నిర్వహించిన సమ్మెలో భాగంగా శుక్రవారం బోధన్ లోని అంబేద్కర్ చౌరస్తా వద్ద కేంద్ర ప్రభుత్వ దిష్టిబొమ్మను దహనం చేశారు.
ఈ సందర్భంగా గౌతమ్ కుమార్ మాట్లాడుతూ నరేంద్ర మోదీ ప్రభుత్వం నూతన జాతీయ విద్యా విధానం ద్వారా విద్యా ప్రైవేటీకరణ, కార్పొరేటీకరణకు ప్రయత్నిస్తోందని ధ్వజమెత్తారు. యూనివర్సిటీలకు స్వయం ప్రతిపత్తి లేకుండా ప్రభుత్వం అజమాయిషీ చెలాయించడం కోసమే కొత్త చట్టాన్ని తీసుకొచ్చారన్నారు. ఎన్సీఈఆర్ టీ ద్వారా పాఠ్యపుస్తకాల్లో చరిత్రను వక్రీకరించే ప్రయత్నం జరుగుతోందన్నారు.
ఎస్సీ, ఎస్టీ, మైనార్టీ స్టూడెంట్స్కు స్కాలర్షిప్, ఫెలోషిప్లలో కోత విధించడం సమంజసం కాదన్నారు. యూనివర్సిటీ గ్రాంట్కమిషన్ కు సరిపడా నిధులు ఇవ్వాలని, కేంద్ర బడ్జెట్ లో విద్యారంగానికి 10 శాతం నిధులు కేటాయించాలని డిమాండ్ చేశారు. రైతులకు వ్యతిరేకంగా తీసుకొస్తున్న మూడు నల్ల చట్టాలను వెనక్కి తీసుకోవాలని డిమాండ్ చేశారు. లేకుంటే పెద్ద ఎత్తున ఆందోళనలు చేపడతామన్నారు. వామపక్ష విద్యార్థి సంఘం లీడర్లు రాజన్న, అంజలి, సాయికుమార్, మోసిన్, ఆకాశ్, సాయినాథ్, ప్రకాశ్ పాల్గొన్నారు.
