హైదరాబాద్సిటీ/ఇబ్రహీంపట్నం, వెలుగు: ‘మిస్టర్ టీ’ ఓనర్, రౌడీ షీటర్ నవీన్ రెడ్డిపై రాచకొండ పోలీసులు నగర బహిష్కరణ విధించారు. చట్ట వ్యతిరేక కార్యకలాపాలకు పాల్పడుతూ ప్రజలను భయాందోళనకు గురిచేస్తుండడంతో ఈ నిర్ణయం తీసుకున్నామని, ఈ బహిష్కరణ ఆరు నెలల పాటు అమల్లో ఉంటుందని సీపీ సుధీర్ బాబు తెలిపారు. నల్లగొండ జిల్లాకు చెందిన కొడుదుల నవీన్ రెడ్డి (32) రంగారెడ్డి జిల్లా అబ్దుల్లాపూర్మెట్లోని తిరుమల హోమ్స్లో నివసించి స్థానికంగా వ్యాపారాలు చేస్తున్నాడు. ఆదిబట్ల పీఎస్లో ఆయనపై దాడి, హత్యాయత్నం, క్రిమినల్ బెదిరింపులు, అల్లర్లు వంటి పలు కేసులు ఉన్నాయి. ఈ రికార్డులను పరిశీలించిన తర్వాత హైదరాబాద్ సిటీ పోలీస్ యాక్ట్, 1348 ఫస్లీ, సెక్షన్ 26(1) ప్రకారం ఇబ్రహీంపట్నం ఏసీపీ ద్వారా నోటీసులు అందజేశారు.
ఏడు రోజుల్లోగా తనను రాచకొండ కమిషనరేట్ పరిధి నుంచి 6 నెలల పాటు ఎందుకు బహిష్కరించకూడదో కారణం తెలపాలని ఆ నోటీసుల్లో పేర్కొన్నారు. కాగా, నవీన్ తరచూ ప్రజలను భయపెడుతూ, బెదిరిస్తున్నాడు. అతని బెదిరింపులతో ప్రజలు సాక్ష్యాలు ఇవ్వడానికి లేదా ఫిర్యాదులు చేయడానికి కూడా భయపడుతున్నారని పోలీసులు తెలిపారు. దీంతో బహిష్కరణ తప్పనిసరియైందన్నారు. ‘మిస్టర్ టీ’ పేరుతో ఫ్రాంచైజీలు నడుపుతున్న నవీన్.. ఇన్స్టాగ్రామ్, యూట్యూబ్లో ఆంట్రప్రెన్యూర్, సోషల్ ఇన్‌‌‌‌ఫ్లూయెన్సర్‌‌‌‌గా చలామణి అవుతున్నాడు. మూడేండ్ల కింద ఓ మెడికల్ విద్యార్థిని కిడ్నాప్ కేసుతో నవీన్ వార్తల్లోకి ఎక్కాడు.
