పెద్ద సంఖ్యలో రైల్వే స్టేషన్ల మెయింటెనెన్స్ కూడా..
దేశవ్యాప్తంగా 550 స్టేషన్లలో వైఫై సౌకర్యం
టూరిస్టు ప్రాంతాలకు తేజస్ రైళ్లను నడిపే యోచన
పంట కోల్డ్ స్టోరేజీతో కృషి రైలు అందుబాటులోకి..
రైల్వేలో ప్రైవేటుకు ట్రాక్ పడుతోంది. ఇప్పటికే కొన్ని రైల్వే స్టేషన్లను, మూడు రైళ్ల నిర్వహణను ప్రైవేటుకు అప్పగించగా.. వచ్చే ఫైనాన్షియల్ ఇయర్లో పెద్ద సంఖ్యలో రైల్వే స్టేషన్లను, 150కిపైగా రైళ్లను ప్రైవేటు నిర్వహణకు ఇచ్చేందుకు రంగం సిద్ధమైంది. ఈ మేరకు కేంద్ర ఆర్థిక మంత్రి నిర్మలా సీతారామన్ బడ్జెట్లో ప్రతిపాదనలు చేశారు. మొత్తంగా రైల్వేల వ్యయాన్ని రూ.2.54 లక్షల కోట్లుగా పేర్కొన్నారు. ఇందులో క్యాపిటల్ఎక్స్పెండిచర్ కింద రూ.లక్షా 61 వేల కోట్లు చూపారు. జీతాలు, పెన్షన్లు, ఇతర ఖర్చులు ఉండే రెవెన్యూ వ్యయం రూ.92,993 కోట్లు అవుతుందని అంచనా వేశారు. రైల్వేల సొంత ఆదాయానికి తోడు కేంద్ర బడ్జెట్ నుంచి రూ. 70 వేల కోట్లను అదనంగా కేటాయిస్తున్నట్టు తెలిపారు. రైల్వే క్యాపిటల్ వ్యయంగత బడ్జెట్లో రూ.లక్షా 56 వేల కోట్లుకాగా.. ఈసారి మూడు శాతం పెరిగింది. రెవెన్యూ వ్యయం కూడా సుమారు ఎనిమిది శాతం పెరిగింది.
మరిన్ని తేజస్ రైళ్లు
వేగంగా ప్రయాణించే తేజస్ రైళ్లను దేశవ్యాప్తంగా మరిన్ని రూట్లలో నడపాలని నిర్ణయించారు. ముఖ్యంగా టూరిస్టు ప్రాంతాలను కలిపే రూట్లకు ప్రాధాన్యత ఇస్తామని కేంద్ర ఆర్థిక మంత్రి వెల్లడించారు. డిజిటల్ ఇండియా స్కీమ్లో భాగంగా దేశవ్యాప్తంగా మరో 550 రైల్వే స్టేషన్లలో వైఫై సౌకర్యం కల్పించనున్నట్టు తెలిపారు. ముంబై, అహ్మదాబాద్ మధ్య హైస్పీడ్ ట్రెయిన్ నడిపిస్తామన్నారు. మరిన్ని రైల్వే స్టేషన్ల పునరుద్ధరణ, 150 రైళ్ల నిర్వహణను ప్రైవేటుకు అప్పగిస్తామని ప్రకటించారు. రైతులకు ప్రయోజనం కలిగించేలా కృషి రైలును అందుబాటులోకి తెస్తామని ఫైనాన్స్ మినిస్టర్ ప్రకటించారు. పంటలు, ఇతర ఉత్పత్తులు ఎండ, వేడికి దెబ్బతినకుండా ఆ రైలులో కోల్డ్ ట్రాన్స్పోర్టు సదుపాయం కూడా ఉంటుందని తెలిపారు. ‘పబ్లిక్, ప్రైవేట్పార్టనర్షిప్(పీపీపీ)’ విధానంలో ఈ రైళ్లను నడుపుతామని, దేశవ్యాప్తంగా వివిధ ప్రాంతాల మధ్య కోల్డ్ సప్లై చైన్ ఏర్పాటవుతుందని చెప్పారు.
మూడో ప్రైవేటు రైలు..
ఐఆర్సీటీసీ ఆధ్వర్యంలో మరో ప్రైవేటు రైలుకు గ్రీన్సిగ్నల్ పడింది. మధ్యప్రదేశ్లోని ఇండోర్ నుంచి యూపీలోని వారణాసి మధ్య ప్రైవేటు ట్రెయిన్ నడపనున్నట్టు రైల్వో బోర్డు చైర్మన్ వినోద్కుమార్ యాదవ్ శనివారం ప్రకటించారు. ఇప్పటికే ఢిల్లీ–లక్నో, అహ్మదాబాద్–ముంబై మధ్య రెండు ప్రైవేటు రైళ్లు నడుస్తున్నాయి. ఈ నెల 20వ తేదీ నుంచి మూడో ప్రైవేటు రైలు ప్రారంభమవుతోంది.