న్యూఢిల్లీ: యోగా గురువు బాబా రామ్‌‌‌‌దేవ్ నేతృత్వంలోని పతంజలి ఆయుర్వేద్ సంస్థ అనుమానాస్పద లావాదేవీల ఆరోపణలపై ప్రభుత్వం విచారణ జరుపుతున్నట్టు తెలుస్తోంది. ఈ సంస్థ నిధులను మళ్లించినట్టు, పాలనాపరమైన లోపాలు ఉన్నట్టు ఆరోపణలు వచ్చాయి. పన్నులు ఎగ్గొట్టారని, అక్రమంగా రిఫండ్లను పొందారంటూ వార్తలు వచ్చాయి. కేన్సర్ వంటి ప్రమాదకర వ్యాధులను తమ ప్రొడక్టులు నయం చేస్తాయంటూ ఇచ్చిన ప్రకటనలను కోర్టులు తప్పుబట్టాయి. వీటన్నింటిపై ప్రస్తుతం విచారణ జరుగుతున్నట్లు తెలుస్తోంది. పతంజలి సంస్థ ఆర్థిక కార్యకలాపాలు, ముఖ్యంగా కొన్ని లావాదేవీలు నిబంధనలకు విరుద్ధంగా ఉన్నాయనే ఆరోపణలు వెల్లువెత్తాయి.
ఈ నేపథ్యంలో, ప్రభుత్వం ఈ వ్యవహారంపై లోతైన విచారణకు ఆదేశించినట్లు తెలుస్తోంది. ఈ విచారణలో భాగంగా, పతంజలి ఆర్థిక రికార్డులు, లావాదేవీల వివరాలు, ఇతర సంబంధిత పత్రాలను పరిశీలిస్తున్నట్లు సమాచారం. గత కొన్నేళ్లుగా పతంజలి ఆయుర్వేద్ దేశంలో వేగంగా విస్తరించింది. ఆయుర్వేద ఉత్పత్తుల నుంచి ఎఫ్‌‌‌‌ఎంసీజీ రంగం వరకు అనేక ఉత్పత్తులను మార్కెట్లోకి విడుదల చేసింది. ఈ విస్తరణ క్రమంలోనే కొన్ని ఆర్థిక లావాదేవీలపై అనుమానాలు వ్యక్తమయ్యాయి. ప్రభుత్వ విచారణకు పతంజలి సంస్థ పూర్తి సహకారం అందిస్తుందని, తమపై వచ్చిన ఆరోపణలు నిరాధారమైనవని సంస్థ ప్రతినిధులు పేర్కొంటున్నట్లు సమాచారం.
