బచ్చన్నపేట,వెలుగు: రేవంత్ రెడ్డి ఒక పిట్టల దొర అని, బండి సంజయ్ ఒక బ్రోకర్ అని జనగామ ఎమ్మెల్యే ముత్తిరెడ్డి యాదగిరిరెడ్డి మండిపడ్డారు. అభివృద్ధిని చూసి ఓర్వలేకనే బ్రోకర్ మాటలు మాట్లాడుతున్నారని ధ్వజమెత్తారు. శనివారం బచ్చన్నపేటలో పీఏసీఎస్ ఆఫీస్, గోదాం, ఓవర్ హెడ్ ట్యాంక్, సీసీ రోడ్లను ఆయన ప్రారంభించారు. ఈసందర్భంగా ముత్తిరెడ్డి మాట్లాడుతూ.. కేంద్రం వడ్ల కొనుగోళ్లు చేయమని చేతులెత్తేస్తేనే.. రాష్ట్ర ప్రభుత్వం కొనుగోలు చేసిందన్నారు. ప్రత్యేక రాష్ట్రంలో కేసీఆర్ పనితనం వల్ల సాగు నీటి సమస్యలు దూరమయ్యాయన్నారు. బీజేపీ, కాంగ్రెస్నాయకులు చేస్తున్న విమర్శలను టీఆర్ఎస్ నాయకులు తిప్పికొట్టాలన్నారు. కార్యక్రమంలో రైతుంబంధు జిల్లా కో ఆర్డినేటర్ ఇర్రి రమణారెడ్డి, జడ్పీవైస్చైర్మన్ భాగ్యలక్ష్మి, పీఎసీఎస్ చైర్మన్ పులిగిళ్ల పూర్ణచందర్, ఎంపీపీ బావండ్ల నాగజ్యోతి, సర్పంచ్లు వడ్డెపల్లి మల్లారెడ్డి, మధు, బాల్రెడ్డి తదితరులున్నారు.
వర్క్స్ స్పీడప్ చేయాలి..
జనగామ, వెలుగు: జిల్లాలో చేపట్టిన ‘మన ఊరు–మన బడి’, పల్లెప్రగతి, హరితహారం, ఆట స్థలాల పనులు స్పీడప్ చేయాలని ఎమ్మెల్యే ముత్తిరెడ్డి యాదగిరి రెడ్డి, కలెక్టర్ శివలింగయ్య ఆదేశించారు. శనివారం కలెక్టరేట్లో ఆఫీసర్లతో వీడియో కాన్ఫరెన్స్ నిర్వహించారు. ఆఫీసర్లు, ప్రజాప్రతినిధులంతా కలిసి ఆయా పనుల్ని గడువులోగా పూర్తి చేయాలన్నారు. వానలు ప్రారంభమైన నేపథ్యంలో పెద్ద ఎత్తున మొక్కలు నాటాలన్నారు.
