భద్రాద్రికొత్తగూడెం/మణుగూరు, వెలుగు: భద్రాద్రికొత్తగూడెం జిల్లా మణుగూరు మండలం పగిడేరులో ఏర్పాటు చేయనున్న జియో థర్మల్ విద్యుత్ కేంద్రం ప్రాంతాన్ని ఆఫీసర్లు, రీసెర్చ్సెంటర్ ప్రతినిధులు శుక్రవారం పరిశీలించారు. సంబంధిత వివరాలను సింగరేణి కంపెనీ ఆర్అండ్ డీ(రీసెర్చ్ అండ్ డెవలప్మెంట్) జీఎం సుభానీకి వివరించారు. కిలో మీటరు లోతు నుంచి వచ్చే వేడి నీటితో విద్యుత్ ఉత్పత్తి చేయడమే లక్ష్యంగా కోల్ మినిస్ట్రీ చర్యలు చేపట్టిందన్నారు. విద్యుత్ కేంద్రం నిర్మాణానికి ఇప్పటికే రూ.1.72 కోట్లను రిలీజ్ చేసిందన్నారు. మినిస్ట్రీ ఆఫ్ సైన్స్ అండ్ టెక్నాలజీ సంస్థ బోర్ వెల్ నుంచి నిరంతరం వచ్చే వేడి నీటి ద్వారా 20 కిలోవాట్ల నుంచి 100 కిలో వాట్ల వరకు విద్యుత్ ఉత్పత్తి చేయవచ్చని నిర్ధారించినట్లు చెప్పారు. అందుకు అవసరమైన సహకారాన్ని సింగరేణి కంపెనీ అందిస్తుందని తెలిపారు. సింగరేణి సంస్థ, శ్రీరామ్ ఇన్స్టిట్యూట్ ఫర్ ఇండస్ట్రియల్ రీసెర్చ్ భాగస్వామ్యంతో ఈ విద్యుత్ కేంద్రాన్ని నిర్మించనున్నట్టు వివరించారు.
