- ఉద్యోగాల ప్రకటనలతో బీజేపీ, కాంగ్రెసోళ్లు బేజారైపోయిండ్రు
- తక్కువ అప్పులు చేసిన రాష్ట్రాల్లో తెలంగాణది ఐదో స్థానం: హరీశ్రావు
హైదరాబాద్, వెలుగు: కొత్తగా ఉద్యోగాలు పొందే వారి జీతాల కోసం బడ్జెట్లో రూ.2 వేల కోట్లు కేటాయించామని ఆర్థిక శాఖ మంత్రి హరీశ్ రావు వెల్లడించారు. మూడు నెలలకు కొన్ని, ఆర్నెళ్లకు కొన్ని, ఎనిమిది నెలలకు మరికొన్ని పోస్టులు విడతలవారీగా భర్తీ చేస్తామని చెప్పారు. పోస్టులన్నీ ఒకేసారి భర్తీ చేయకపోవడం వల్ల బడ్జెట్ సమస్య రాకపోవచ్చన్నారు. కౌన్సిల్ లో గురువారం బడ్జెట్పై పలువురు సభ్యులు అడిగిన ప్రశ్నలకు ఆయన సమాధానమిచ్చారు.
బిశ్వాల్ కమిటీ రిపోర్టులో తప్పుడు లెక్కలు
పీఆర్సీ కోసం నియమించిన బిశ్వాల్ కమిటీ వైద్య విధాన పరిషత్, సోషల్, బీసీ, ట్రైబల్, మైనార్టీ వెల్ఫేర్ డిపార్ట్మెంట్లలోని 54 వేల ఉద్యోగాలను పరిగణనలోకి తీసుకోలేదన్నారు. ఆ కమిటీ రిపోర్టులో తప్పుడు లెక్కలు ఉన్నాయన్నారు. దేశ చరిత్రలో ఒకేసారి ఇన్ని పోస్టులను ప్రకటించిన ఘనత కేసీఆర్ కే దక్కుతుందన్నారు. 9, 10వ షెడ్యూల్లోని సంస్థల విభజన పూర్తయితే మరో 10 వేల నుంచి 20 వేల ఉద్యోగాలు వస్తాయన్నారు. దేశంలో 15 లక్షల ఉద్యోగాలు ఖాళీగా ఉన్నాయని, ఆ పోస్టులు భర్తీ చేస్తే మన రాష్ట్రానికి 50 వేల ఉద్యోగాలు వస్తాయని, బీజేపీ నాయకులకు దమ్ముంటే ఆ పోస్టులు భర్తీ చేయించాలన్నారు. వ్యవసాయం, కరెంట్, మైనార్టీ సంక్షేమం కోసం పదేళ్ల కాంగ్రెస్ పాలనలో పెట్టిన ఖర్చు టీఆర్ఎస్ ప్రభుత్వం కేవలం ఒక్క ఏడాదిలోనే చేసిందన్నారు. ఎరువుల కోసం క్యూలైన్లు, కరెంట్ కష్టాలు రాష్ట్రంలో లేవన్నారు. రైతు బంధు ఇచ్చి మిగతా స్కీమ్ లన్ని బంద్ చేశారని ఎమ్మెల్సీ జీవన్ రెడ్డి చేసిన ఆరోపణల్లో వాస్తవం లేదన్నారు. రాష్ట్రం ఏర్పడిన సమయంలో కేవలం 84 గ్రామపంచాయతీల్లోనే ట్రాక్టర్లు ఉండేవని, ఇప్పుడు ట్రాక్టర్లేని జీపీ లేదన్నారు. దేశంలో అప్పులు తక్కువ చేసిన రాష్ట్రాల జాబితాలో తెలంగాణ ఐదో స్థానంలో ఉందని, ఎఫ్ఆర్బీఎం పరిమితులకు లోబడే అప్పులు చేస్తున్నామని తెలిపారు. సంపద పెంచడంలో దేశానికే మన రాష్ట్రం ఆదర్శంగా నిలిచిందని, ప్రస్తుతం స్టేట్ ఓన్ ట్యాక్స్ రెవెన్యూ లక్ష కోట్లు దాటిందని వెల్లడించారు.
యూనివర్సిటీ కాంట్రాక్ట్ లెక్చరర్లకు ఫిట్మెంట్ వర్తింపజేయాలి
రాష్ట్రంలోని వివిధ యూనివర్సిటీల్లో పనిచేస్తున్న కాంట్రాక్ట్ లెక్చరర్లకు పీఆర్సీ, 30 శాతం ఫిట్ మెంట్ వర్తింపజేయాలని ఎమ్మెల్సీ రఘోత్తంరెడ్డి మండలిలో హరీశ్ రావు దృష్టికి తీసుకొచ్చారు. దీనిపై మంత్రి స్పందిస్తూ రాష్ట్రంలో ఔట్ సోర్సింగ్, కాంట్రాక్ట్ ఉద్యోగులందరికీ ఫిట్మెంట్, పీఆర్సీ వర్తింపజేశామని, యూనివర్సిటీ కాంట్రాక్ట్ లెక్చరర్ల వివరాలు
కూడా తెప్పించుకుని న్యాయం చేస్తామని హామీ ఇచ్చారు.
