గాంధీనగర్: ప్రపంచంలోనే అత్యధిక సీటింగ్ కెపాసిటీ గల క్రికెట్ గ్రౌండ్ నరేంద్ర మోడీ స్టేడియం. గుజరాత్లోని అహ్మదాబాద్ మోటేరాలో 1 లక్షా 32 వేల సీట్ల సామర్థ్యంతో ఈ మైదానాన్ని నిర్మించారు. అయితే.. ఇండియాలోనే ఉన్న ఈ వరల్డ్ లార్జెస్ట్ క్రికెట్ గ్రౌండ్ టీమిండియాకు ఏ మాత్రం అచ్చి రావడం. ఇందుకు ప్రధాన కారణం ఈ గ్రౌండ్లో ఇండియా ఆడిన రెండు ఐసీసీ వరల్డ్ కప్ మ్యాచులు ఓడిపోవడమే.
ఐసీసీ ఈవెంట్లలో భాగంగా గత 29 మ్యాచ్ల్లో భారత్ కేవలం 2 మ్యాచ్ల్లో మాత్రమే ఓడిపోయింది. ఓటమి పాలైన ఈ రెండు మ్యాచులు కూడా నరేంద్ర మోడీ స్టేడియంలోనే కావడం గమనార్హం. 2023, వన్డే వరల్డ్ కప్లో రోహిత్ శర్మ నేతృత్వంలోని టీమిండియా ఓటమి ఎరగకుండా మెగా టోర్నీ ఫైనల్కు చేరుకుంది.
కానీ నరేంద్ర మోడీ స్టేడియంలో ఆస్ట్రేలియాతో జరిగిన ఫైనల్ మ్యాచులో మాత్రం టీమిండియా ఓటమి పాలై కప్కు అడుగు దూరంలోనే నిలిచిపోయింది. ఇదిలా ఉండగా.. 2026 టీ20 వరల్డ్ కప్ సూపర్ 8 రౌండ్లో భాగంగా ఇదే నరేంద్ర మోడీ స్టేడియంలో జరిగిన మ్యాచులో సౌతాఫ్రికాతో చేతిలో టీమిండియా 75 పరుగుల తేడాతో ఘోర ఓటమి చవిచూసింది.
ఇది చాలదన్నట్లుగా ఈ టీ20 వరల్డ్ కప్ ఫైనల్ మ్యాచ్ కూడా ఇదే స్టేడియంలో జరగనుండటం అభిమానులను మరింత ఆందోళనకు గురి చేస్తోంది. ఈ పరిణామాలను దృష్టిలో ఉంచుకునే నరేంద్ర మోడీ స్టేడియం టీమిండియాకు అస్సలు అచ్చిరావట్లేదని.. ఇక్కడ ఇండియాకు కీలకమైన మ్యాచులు పెట్టొద్దని సోషల్ మీడియాలో కామెంట్స్ చేస్తున్నారు.
1 లక్షా 32 వేల సీట్ల సామర్ధ్యం ఉన్న ఈ స్టేడియంలో మ్యాచ్ నిర్వహిస్తే భారీగా జనం స్టేడియానికి వస్తారనేది బీసీసీఐ, ఐసీసీ వ్యూహం. కానీ మోడీ స్టేడియంలో వెంటాడుతోన్న బ్యాడ్ సెంటిమెంట్ కారణంగా అహ్మదాబాద్లో మ్యాచులు అస్సలు వద్దని అంటున్నారు టీమిండియా అభిమానులు.
