ఫ్రెంచ్ ఓపెన్ సెమీస్లో రష్యా- ఉక్రెయిన్ ఢీ.. ఆండ్రీవాతో  తలపడనున్న కోస్టియుక్ 

పారిస్: ఫ్రెంచ్ ఓపెన్ గ్రాండ్ స్లామ్ టోర్నీ ఆసక్తికర మలుపులు తిరుగుతోంది. మహిళల సింగిల్స్ సెమీఫైనల్లో రష్యా, ఉక్రెయిన్ దేశాల మధ్య రసవత్తర పోరు ఖరారైంది. యుద్ధం నేపథ్యంలో తీవ్ర ఉద్రిక్తతలు ఉన్నప్పటికీ మైదానంలో ఈ ఇద్దరు క్రీడాకారులు తలపడనుండడం ప్రపంచవ్యాప్తంగా చర్చనీయాంశంగా మారింది. మంగళవారం జరిగిన ఉక్రెయిన్ ఆటగాళ్ల క్వార్టర్ ఫైనల్ మ్యాచ్‌‌‌‌‌‌‌‌లో పదిహేనో సీడ్ మార్టా కోస్టియుక్ అద్భుత ప్రదర్శన చేసింది. 

ఏడో సీడ్ ఎలినా స్వితోలినాతో మూడు సెట్ల పాటు హోరాహోరీగా సాగిన పోరులో కోస్టియుక్ 6–3, 2–6, 6–2తో విజయం సాధించింది. క్లే కోర్టుపై అద్భుత రికార్డు ఉన్న కోస్టియుక్ ఫ్రెంచ్ ఓపెన్ సెమీఫైనల్‌‌‌‌‌‌‌‌కు చేరుకున్న తొలి ఉక్రెయిన్ మహిళగా చరిత్ర సృష్టించింది. యుద్ధ నిబంధనల ప్రకారం మ్యాచ్ ముగిసిన తర్వాత కోస్టియుక్.. నెట్ వద్ద ప్రత్యర్థితో కరచాలనం చేయలేదు. 

రష్యా తాజాగా జరిపిన డ్రోన్, క్షిపణి దాడుల్లో 18 మంది పౌరులు మరణించగా ఈ విజయాన్ని కోస్టియుక్ దేశ ప్రజల పోరాటపటిమకు అంకితమిచ్చింది. మరో క్వార్టర్ ఫైనల్లో రష్యాకు చెందిన 19 ఏళ్ల యువ సంచలనం మిరా ఆండ్రీవా 6–0, 6–3 తో రొమేనియా వెటరన్ ప్లేయర్ సొరానా చిర్‌‌‌‌‌‌‌‌ స్టెయాను సులువుగా ఓడించి సెమీస్‌‌‌‌‌‌‌‌కు దూసుకెళ్లింది. 

యుద్ధ వాతావరణంలో ఉక్రెయిన్ ప్లేయర్‌‌‌‌‌‌‌‌తో తలపడడంపై ఆండ్రీవా స్పందిస్తూ తనకు ప్రత్యర్థి ఎవరనేది ముఖ్యం కాదని, కేవలం బంతిని ఎదుర్కోవడంపైనే దృష్టి పెడతానని తెలిపింది. మరో కీలక మ్యాచ్‌‌‌‌‌‌‌‌లో టాప్ ర్యాంకర్ అరినా సబలెంక క్వార్టర్ ఫైనల్లోకి ప్రవేశించింది. నాలుగు సార్లు గ్రాండ్ స్లామ్ చాంపియన్ అయిన నయామి ఒసాకా (జపాన్)ను ఓడించింది. నిలకడైన ప్రదర్శనతో 7–5, 6-–3తో విజయం సాధించింది. తదుపరి మ్యాచ్‌‌‌‌‌‌‌‌లో సబలెంక, అమెరికా క్రీడాకారిణి మాడిసన్ కీస్‌‌‌‌‌‌‌‌ను ఓడించిన డయానా ష్నైడర్‌‌‌‌‌‌‌‌తో తలపడనుంది. 

ఇటాలియన్ల హవా

టాప్ ర్యాంకర్ యానిక్ సిన్నర్ రెండో రౌండ్‌‌‌‌‌‌‌‌లోనే ఓడిపోయినప్పటికీ, పురుషుల విభాగంలో ఇటలీ ఆటగాళ్లు ముందంజలో ఉన్నారు. పదో సీడ్ ఫ్లావియో కోబొల్లి అమెరికాకు చెందిన జాకరీ స్వజ్దాను 6-2, 6-3, 6-7, 7-6 తో ఓడించి కెరీర్‌‌‌‌‌‌‌‌లో తొలిసారి క్వార్టర్స్ చేరాడు. మాటెయో బెర్రెట్టిని 6-3, 7-6, 7-6 తో జువాన్ మాన్యుయెల్ సెరుండోలోను ఓడించి క్వార్టర్స్‌‌‌‌‌‌‌‌లోకి అడుగుపెట్టాడు.

మరో ఉత్కంఠభరిత పోరులో మాటెయో అర్నాల్డి 5 గంటల 26 నిమిషాల పాటు పోరాడి ఫ్రాన్సెస్ టియాఫోను ఓడించి క్వార్టర్స్ చేరిన మూడో ఇటాలియన్‌‌‌‌‌‌‌‌గా నిలిచాడు. క్వార్టర్ ఫైనల్లో బెర్రెట్టిని, అర్నాల్డి ఒకరితో ఒకరు తలపడనుండడంతో ఒక ఇటాలియన్ సెమీస్‌‌‌‌‌‌‌‌కు చేరడం ఖాయమైంది. రాబోయే మ్యాచ్‌‌‌‌‌‌‌‌ల్లో స్పెయిన్ ఆటగాడు రాఫెల్ జోదార్ రెండో సీడ్ జ్వెరెవ్‌‌‌‌‌‌‌‌తో, జాకుబ్ మెన్సిక్ బ్రెజిల్ ఆటగాడు జోనో ఫోన్సెకాతో పోటీపడనున్నారు.