ఫ్రెంచ్ ఓపెన్: క్వార్టర్ ఫైనల్లో ఓడిన ప్రపంచ నంబర్ వన్ క్రీడాకారిణి సబలెంకా

పారిస్: ఫ్రెంచ్ ఓపెన్ క్వార్టర్ ఫైనల్లో ప్రపంచ నంబర్ వన్ క్రీడాకారిణి, టాప్ సీడ్ అరినా సబలెంకా అనూహ్యంగా పరాజయం పాలైంది. బుధవారం జరిగిన హోరాహోరీ పోరులో అన్‌‌సీడెడ్ ప్లేయర్​డయానా ష్నైడర్ 3–-6, 7–-5, 6–-0 స్కోరుతో సబలెంకాపై అద్భుత విజయం సాధించి టోర్నీ నుంచి ఇంటికి పంపింది. 

నాలుగు సార్లు మేజర్ టైటిల్ గెలిచిన సబలెంకా, రెండో సెట్‌‌లో 4 –1 ఆధిక్యంతో నిలిచి సులువుగా గెలిచేలా కనిపించింది. మ్యాచ్ కోసం సర్వీస్ చేస్తూ విజయానికి 2 పాయింట్ల దూరంలో ఉన్న దశలో ఒక్కసారిగా ఒత్తిడికి లోనై మ్యాచ్‌‌ను చేజార్చుకుంది. తన కెరీర్‌‌లో తొలిసారి గ్రాండ్​స్లామ్ క్వార్టర్ ఫైనల్ ఆడుతున్న ష్నైడర్ అద్భుతంగా పుంజుకుని సబలెంకా సర్వీస్‌‌ను బ్రేక్ చేసింది.

నిర్ణయాత్మక మూడో సెట్‌‌లో పూర్తిగా నిరాశపరిచిన బెలారస్ ప్లేయర్​సబలెంకా చివరి 13 గేమ్‌‌ల్లో 12 కోల్పోయి మ్యాచ్‌‌ను నెట్‌‌కు కొట్టి ఓటమిని కొనితెచ్చుకుంది. మరో మ్యాచ్‌‌లో అన్‌‌సీడెడ్ పోలిష్ ప్లేయర్, ​క్వాలిఫైయర్ మాయా చ్వాలిన్స్కా తన అద్భుత ఫామ్‌‌ను కొనసాగిస్తూ 22వ సీడ్ అన్నా కలస్కాయాను 7-–6 (3), 6–-3 తేడాతో ఓడించి సెమీఫైనల్‌‌కు దూసుకెళ్లింది. 

ఈ విజయంతో రోలాండ్ గారోస్‌‌లో సెమీస్ చేరిన రెండో పోలిష్ మహిళగా ఆమె రికార్డు సృష్టించింది. ఈ టోర్నీకి ముందు ఏ మేజర్‌‌లోనూ రెండో రౌండ్ దాటని 24 ఏళ్ల చ్వాలిన్స్కా, సెమీస్ చేరడం ద్వారా ఏకంగా 750,000 యూరోల ప్రైజ్ మనీని ఖాయం చేసుకుంది.