బలగం... ఇప్పుడు ఏ ఇద్దరు సీని లవర్స్ కలిసిన మాట్లాడుకునేది ఈ సినిమా గురించే... చిన్న సినిమాగా వచ్చిన ఈ చిత్రం పెద్ద ప్రభంజనమే సృష్టించింది. తెలంగాణ సంస్కృతిని ప్రతిబింబిస్తూ .. మానవ సంబంధాలను అత్యంత సహజంగా తెరకెక్కి్ంచారు. ఓటీటీలోకి ఈ సినిమా వచ్చినప్పటికి ప్రేక్షకులు ఇంకా థియేటర్ లోకి వెళ్లి చూస్తున్నారు. అయితే ఈ సినిమాను అందరూ చూడాలని కొందరు గ్రామస్థులు తమ గ్రామంలో ఈ చిత్రాన్ని ప్రదర్శిస్తున్నారు.
శంషాబాద్ మండల పరిధి కవ్వగూడ గ్రామంలో బలగం సినిమాని చూసేందుకు ఆ గ్రామ సర్పంచ్ రమేష్ యాదవ్ ఏర్పాటు చేశారు. ఈ సినిమాను చూడడానికి ఐదు సంవత్సరాల చిన్నారుల నుండి 60 , 70 సంవత్సరాల వృద్ధుల కూడా తరలివచ్చారు. దాదాపుగా1500 నుండి 2000వేల మంది వరకు గ్రామ ప్రజలు అందరూ ఆరుబయట కూర్చొని బలగం చిత్రాన్ని వీక్షించారు. ఈ సినిమా ద్వారా పాత జ్ఞాపకాలను గుర్తుచేసుకుంటూ ఎమోషనల్ అయ్యారు.
సినిమా పూర్తిగా తెలంగాణ యాసలో, పల్లెటూరు వాతావరణంలో నిర్మించబడిందని, అందువల్లే గ్రామస్తులందరికీ ఈ చిత్రాన్ని చూపించాలన్న ఉద్దేశంతో తమ గ్రామంలో ప్రదర్శించడం జరిగిందని ఆ గ్రామ సర్పంచ్ రమేష్ యాదవ్ తెలిపారు.
