ఇప్పుడు ఏడాదంతా దాదాపు అన్నిరకాల పండ్లు, కూరగాయలు దొరుకుతున్నాయి. కానీ, అవన్నీ కోల్డ్ స్టోరేజీ చేసినవే. పైగా ఇవి సీజన్లో దొరికే వాటంత టేస్ట్ ఉండవు. అంతేకాదు ప్రిజర్వేటివ్స్ కలిపిన వీటిని తింటే ఆరోగ్యం దెబ్బతినే ఛాన్స్ ఉంది. అందుకే ‘ సీజనల్ ఫ్రూట్స్, ఫుడ్ ఎక్కువ తినండి’ అని డాక్టర్లు, న్యూట్రిషనిస్టులు తరచూ చెప్తుంటారు. సీజన్లో దొరికే పండ్లు, కూరగాయలు ఫ్రెష్గా ఉంటాయి. వీటిలో న్యూట్రిషన్లు నిండుగా ఉంటాయి. ‘మెనూలో సీజనల్ ఫుడ్ ఉంటే ఆరోగ్యం మన చేతుల్లో ఉన్నట్టే’ అంటోంది డాక్టర్ రాజ్యలక్ష్మి దేవి.
సీజన్లో పండే కూరగాయలు, పండ్లలో విటమిన్లు, యాంటీ ఆక్సిడెంట్లు, ఫైటోన్యూట్రియెంట్లు ఎక్కువ. అంతేకాదు సహజంగా మగ్గిన పండ్లు, ప్రిజర్వేటివ్స్ కలిపిన వాటికంటే టేస్టీగా ఉంటాయి. సీజన్లో దొరికే పండ్లు, కూరగాయలు అగ్గువకే దొరుకుతాయి కూడా. కారణం వాటిని ఆయా సీజన్లలో పెద్ద మొత్తంలో పండిస్తారు. దాంతో మార్కెట్లో, తోపుడు బండ్ల మీద... ఇలా ఎక్కడ చూసినా ఇవే కనిపిస్తాయి. అయితే, సీజన్ తర్వాత దొరికే పండ్లు, కూరగాయలు చాలా వరకు కోల్డ్ స్టోరేజ్ చేసినవే. దాంతో వాటిలోని న్యూట్రియెంట్ల శాతం తగ్గిపోతుంది. పైగా వాటికి ధర ఎక్కువ. సీజన్లో దొరికే ఫుడ్లో కెమికల్స్ తక్కువ ఉంటాయి. ఎందుకంటే వీటిని కోల్డ్ స్టోరేజ్ చేయరు. ప్రిజర్వేటివ్స్ ఉండవు. రోజుల తరబడి ఫ్రిజ్లో ఉంచాల్సిన అవసరం కూడా ఉండదు.
ఈ పండ్లు తినాల్సిందే
- ముఖ్యంగా ఈ సీజన్లో తినాల్సినవి రేగుపండ్లు.
- రక్తం తక్కువ ఉన్నవాళ్లు రేగుపండ్లు తినడం మంచిది. ఈ పండ్లలో ఐరన్, ఫాస్పరస్ ఎక్కువగా ఉండటం వల్ల ఎర్ర రక్తకణాలు పెరుగుతాయి. ఆల్కలాయిడ్స్ రక్తాన్ని శుభ్రంచేస్తాయి.
- రేగుపండులో ఆరెంజెస్లో ఉండే దానికన్నా ఎక్కువ విటమిన్– సి ఉంటుంది. ఇందులోని యాంటీబయాటిక్స్ తరచుగా రోగాల బారిన పడకుండా కాపాడతాయి. విటమిన్ –ఎ స్కిన్ గ్లో అయ్యేలా చేస్తుంది.
- ఇందులోని యాంటీఆక్సిడెంట్స్ బ్రెయిన్ ఫంక్షన్స్ ని మెరుగుపరిచి, నిద్ర మంచిగా పట్టేలా చేస్తాయి.
- ఈ పండులో ఎక్కువ ప్రొటీన్స్, ఫైబర్, తక్కువ క్యాలరీలు ఉంటాయి. డైజెషన్ ప్రాబ్లమ్స్ ఉన్నవాళ్లు ఈ పండుని తినొచ్చు.
- దీనిలో ఉన్న క్యాల్షియం ఎముకలను బలంగా చేస్తుంది. ఎదుగుతున్న పిల్లలకు వీటిని తినిపిస్తే శరీరం దృఢంగా తయారవుతుంది.
వింటర్లో దొరికేవి
క్యారెట్లు, పాలకూర, మెంతికూర, బఠాణీలు, బీట్రూట్, ర్యాడిష్ వంటి కూరగాయలు ఈ సీజన్లో ఎక్కువ పండుతాయి. ఆరెంజ్, యాపిల్, దానిమ్మ, గ్రేప్స్, కివి, జామ, స్ట్రాబెర్రీ, రేగు వంటి పండ్లు ఈ సీజన్లో బాగా దొరుకుతాయి. వీటిని తింటే సరిపోను పోషకాలు అందుతాయి. సీజనల్ ఫుడ్ తినడం వల్ల మరో లాభం ఏమిటంటే... సీజనల్గా వచ్చే హెల్త్ ప్రాబ్లమ్స్ నుంచి రక్షణ ఉంటుంది.
