పంజాగుట్ట, వెలుగు:హెల్త్చెకప్ కోసం సిటీకి వచ్చిన యువతి రోడ్డు ప్రమాదంలో మృతి చెందింది. చెంగిచెర్లకు చెందిన మేది శంకరరావు ఎస్పీఎఫ్విభాగంలో ఎస్సైగా మణుగూరు పవర్ ప్రాజెక్టులో పనిచేస్తున్నాడు. ఆయన కుమార్తె ప్రసన్న (25) ఎంఎస్సీ పూర్తి చేసి జాబ్ సెర్చింగ్ లో ఉంది. తన హెల్త్ చెకప్ కోసం సోమాజిగూడలోని ఏఐజీ ఆస్పత్రికి తండ్రితో కలిసి సోమవారం బైక్ పై బయలుదేరింది. బేగంపేట మెట్రో స్టేషన్ సమీపంలో వారి బైక్ ను టెంపో వాహనం ఢీ కొనడంతో ప్రసన్న కిందపడి దుర్మరణం చెందింది. స్వల్పంగా గాయపడిన శంకర్ రావును సమీప ఆస్పత్రికి తరలించారు. ఈ మేరకు పంజాగుట్ట పోలీసులు కేసు నమోదు చేసి దర్యాప్తు చేపట్టారు.
నాగారంలో మరో యువతి..
కీసర: మరోచోట బైక్ నుంచి కిందపడిన యువతి పైనుంచి ఆర్టీసీ బస్సు వెళ్లడంతో అక్కడికక్కడే మృతి చెందింది. మేడ్చల్ జిల్లా నాగారం మున్సిపాలిటీలోని ఆర్ఎల్ఆర్ నగర్ బస్టాండ్ వద్ద ఈ ఘటన జరిగింది. నేరేడ్మెట్ కు చెందిన రమ్య (20), నాగారంలో బైక్ మెకానిక్ పనిచేస్తున్న కౌశిక్ కలిసి సోమవారం ఘట్ కేసర్ వైపు బయలుదేరారు. ఈ క్రమంలో నీటి ట్యాంకర్ ఢీ కొనడంతో ఇద్దరు కిందపడ్డారు. అయితే, ఘట్కేసర్ నుంచి సికింద్రాబాద్ వైపు వెళ్తున్న ఆర్టీసీ బస్సు యువతి పైనుంచి వెళ్లడంతో అక్కడికక్కడే ప్రాణాలు విడిచింది. సంఘటనా స్థలానికి చేరుకున్న కీసర పోలీసులు.. డెడ్బాడీని పోస్టుమార్టం నిమిత్తం గాంధీ ఆస్పత్రికి తరలించారు.
