స్వదేశంలో ఫిబ్రవరి 7 నుంచి ప్రారంభం కానున్న 2026 టీ20 వరల్డ్ కప్ కు బీసీసీఐ రిజర్వ్ ఆటగాళ్లకు ప్రకటించలేదు. రిజర్వ్ ఆటగాళ్ల గురించి బీసీసీఐ సెక్రటరీ దేవజిత్ సైకియా మాట్లాడుతూ ఇలా చెప్పుకొచ్చారు. "మొత్తం టోర్నమెంట్ దేశంలో జరుగుతున్నందున ఎటువంటి స్టాండ్బై ప్లేయర్స్ ఉండరు. మేము ఏ సమయంలోనైనా ఏ ఆటగాడిని అయినా భర్తీ చేయవచ్చు". అని
సైకియా జట్టు ప్రకటన విలేకరుల సమావేశంలో అన్నారు. చివరిసారిగా 2024 టీ20 వరల్డ్ కప్ విదేశాల్లో (వెస్టిండీస్, అమెరికా వేదికలుగా) జరగడంతో భారత జట్టు రిజర్వ్ ఆటగాళ్లను ప్రకటించింది. మెన్ ఇన్ బ్లూ జట్టుకు గిల్, రింకు, ఖలీల్ అహ్మద్, అవేష్ ఖాన్ రూపంలో రిజర్వ్ ఆప్షన్లు ఉన్నాయి.
టీ20 వరల్డ్ కప్ కు 15 మంది సభ్యులతో కూడిన భారత జట్టును బీసీసీఐ శనివారం (డిసెంబర్ 20) ప్రకటించింది. అజిత్ అగార్కర్ నేతృత్వంలోని సెలక్షన్ కమిటీ భారత స్క్వాడ్ ను ఎంపిక చేసింది. సూర్యకుమార్ యాదవ్ భారత జట్టుకు కెప్టెన్సీ చేయనున్నాడు. ఫామ్ లో లేని గిల్ పై వేటు వేసి అక్షర్ పటేల్ కు వైస్ కెప్టెన్సీ అప్పగించారు. ఇటీవలే సయ్యద్ ముస్తాక్ అలీ ట్రోఫీలో సత్తా చాటిన ఇషాన్ కిషన్ వరల్డ్ కప్ స్క్వాడ్ లో స్థానం సంపాదించాడు. మరోవైపు సౌతాఫ్రికా సిరీస్ కు ఎంపికైన జితేష్ శర్మకు సెలక్టర్లు షాక్ ఇచ్చారు.
ALSO READ : ఫామ్ కాదు క్లాస్ శాశ్వతం: టీ20 వరల్డ్ కప్కు గిల్ను ఎంపిక చేయకపోవడంపై గవాస్కర్ ఆశ్చర్యం
ఫాస్ట్ బౌలర్లుగా జస్ప్రీత్ బుమ్రా, అర్షదీప్ సింగ్, హర్షిత్ రాణాలను ఎంపిక చేశారు. స్పిన్నర్లుగా వరుణ్ చక్రవర్తి, కుల్దీప్ యాదవ్ లను ఎంపిక చేశారు. ఆల్ రౌండర్లు అక్షర్ పటేల్, వాషింగ్ టన్ సుందర్ రూపంలో మరో ఇద్దరు స్పిన్నర్లు ఉన్నారు. ఫాస్ట్ బౌలింగ్ ఆల్ రౌండర్లుగా హార్దిక్ పాండ్య, శివమ్ దూబే జట్టులో కొనసాగనున్నారు. వికెట్ కీపర్ గా సంజు శాంసన్ కు సెలక్టర్లు చోటు కల్పించారు. ఓపెనర్ గా అభిషేక్ శర్మ తొలిసారి ఐసీసీ ఈవెంట్ ఆడేందుకు సిద్ధమయ్యాడు. మిడిల్ ఆర్డర్ లో తిలక్ వర్మ తన స్థానాన్ని కాపాడుకున్నాడు. తాజాగా ముగిసిన సౌతాఫ్రికా సిరీస్ లో వేటు పడిన రింకూ వరల్డ్ కప్ స్క్వాడ్ లోకి వచ్చాడు.
వరల్డ్ కప్ కు టీమిండియా స్క్వాడ్:
సూర్యకుమార్ యాదవ్ (కెప్టెన్), అభిషేక్ శర్మ, తిలక్ వర్మ, సంజూ శాంసన్ (వికెట్ కీపర్), ఇషాన్ కిషన్ (వికెట్ కీపర్), వరుణ్ చక్రవర్తి, శివమ్ దూబే, హార్దిక్ పాండ్యా, రింకూ సింగ్, అక్షర్ పటేల్ (వైస్ కెప్టెన్), వాషింగ్ టన్ సుందర్, కుల్దీప్ యాదవ్, అర్షదీప్ సింగ్, హర్షిత్ రానా, జస్ప్రీత్ బుమ్రా
