- తుదిదశకు చేరిన అటవీ అనుమతుల ప్రక్రియ
- రాష్ట్ర మంత్రి వివేక్, ఎంపీ వంశీకృష్ణ చొరవతో కదలిక
- మైనింగ్ కార్యకలాపాలకు సింగరేణి ముందస్తు ఏర్పాట్లు
- 18 ఏండ్ల పాటు బొగ్గు ఉత్పత్తికి చాన్స్
కోల్బెల్ట్, వెలుగు: సింగరేణిలో మరో కొత్త గని ప్రారంభానికి వడివడిగా అడుగులు పడుతున్నాయి. మంచిర్యాల జిల్లా మందమర్రి ఏరియాలోని రామకృష్ణాపూర్ ఓపెన్కాస్ట్ విస్తరణలో భాగంగా ఫేజ్–-2 కోల్మైన్ ఏర్పాటుపై సింగరేణి యాజమాన్యం ఫోకస్ పెట్టింది. అటవీ అనుమతుల ప్రక్రియ తుది దశకు చేరుకోవడంతో బొగ్గు ఉత్పత్తి ప్రారంభించేందుకు సన్నాహాలు చేస్తోంది. ఈ ప్రాజెక్టు ప్రారంభమైతే బొగ్గు ఉత్పత్తితో పాటు స్థానికంగా ఉపాధి అవకాశాలు, రామకృష్ణాపూర్తో పాటు పరిసర ప్రాంతాల అభివృద్ధి జరగనుంది. ఇటీవల కేంద్ర అటవీ, పర్యావరణ శాఖ మంత్రి భూపేందర్ యాదవ్ ను మంత్రి వివేక్ వెంకటస్వామి, పెద్దపల్లి ఎంపీ గడ్డం వంశీకృష్ణ కలిసి అటవీ అనుమతులు ఇవ్వాలని విజ్ఞప్తి చేశారు. మంత్రి, ఎంపీ చొరవతో పర్మిషన్ల ప్రక్రియలో కదలిక వచ్చింది. ఇప్పటికే రాష్ట్ర స్థాయిక్లియరెన్స్ రాగా, తుది అనుమతుల కోసం కేంద్ర అటవీ, పర్యావరణ శాఖకు నివేదిక పంపించారు. త్వరలోనే అనుమతులు వస్తాయని అంటున్నారు. ఈ గని ఏర్పాటుతో ఏటా 20 లక్షల టన్నుల చొప్పున 18 ఏండ్ల పాటు 39 మిలియన్ టన్నుల బొగ్గు నిక్షేపాలను వెలికి తీసే అవకాశం ఉంది. ప్రత్యక్షంగా, పరోక్షంగా దాదాపు వెయ్యి మందికి ఉపాధి అవకాశాలు లభించనున్నాయి.
మందమర్రి ఏరియాలో మొదటి ఓసీపీ
మందమర్రి ఏరియాలో బొగ్గు ఉత్పత్తిని పెంచేందుకు రామకృష్ణాపూర్లోని ఎంకే-4, 4ఏ గనులను యాజమాన్యం మూసివేసింది. ఈ రెండు గనులతో పాటు అంతకుముందే మూతపడ్డ ఆర్కే-4 గనిలో మిగిలిన బొగ్గు నిక్షేపాలను వెలికి తీసేందుకు 2013 డిసెంబర్లో రామకృష్ణాపూర్ ఓసీపీని ఏర్పాటు చేసింది. ఏటా 3 లక్షల టన్నుల నుంచి 22 లక్షల టన్నుల ఉత్పిత్తి సాధించే స్థాయికి చేరింది. 1.60 కోట్ల టన్నుల బొగ్గును ఉత్పత్తి చేసింది. ఆ తరువాత బొగ్గు వెలికి తీసేందుకు అవసరమైన భూములు లేకపోవడంతో ఏప్రిల్ 2024లో ఆర్కేపీ ఓసీపీని మూసివేశారు.
ఏర్పాట్లలో సింగరేణి ఆఫీసర్లు
ఆర్కేపీ ఓసీపీ ఫేజ్ 2 మైన్ నుప్రారంభించేందుకు యాజమాన్యం ఏర్పాట్లు చేస్తోంది. మందమర్రి ఏరియా జీఎం రాధాకృష్ణ ఆధ్వర్యంలో పనులు కొనసాగుతున్నాయి. ఇప్పటికే వివిధ హోదాల్లో కీలక ఆఫీసర్లను నియమించారు. గనిలో నాలుగేళ్లలో 1,040 లక్షల క్యూబిక్ మీటర్ల ఓబీని వెలికితీసేందుకు అవసరమైన టెండర్ ప్రక్రియను రెడీ చేశారు. వారం కింద రూ.50 లక్షలతో కొత్తగా షావల్ మెషీన్ కొనుగోలు చేసి ప్రారంభించారు.
రెండో ఫేజ్ విస్తరణపై నజర్
ఆర్కేపీ ఓసీపీ విస్తరణలో భాగంగా ఫేజ్-2 కోల్మైన్ ఏర్పాటు చేయాలని సింగరేణి యాజమాన్యం నిర్ణయించింది. ఇందులోభాగంగా గతంలో మూసివేసిన ఆర్కే1,1ఏ, 2, 3 గనులు ఉన్న ప్రాంతాల్లో(ఆర్కేపీ సీహెచ్పీ ముందు భాగం నుంచి మూసివేసిన ఆర్కే1ఏ మైన్ అటవీ ప్రాంతం వరకు) మిగిలిన బొగ్గు నిక్షేపాలను రెండో ఫేజ్ ద్వారా తీసేందుకు ప్లాన్చేసింది. 366.41 హెక్టార్ల ఫారెస్ట్ ల్యాండ్తో పాటు 600 హెక్టార్ల సాధారణభూమి అవసరమని గుర్తించారు. కాంగ్రెస్ ప్రభుత్వం అధికారంలోకి వచ్చాక ఆర్కేపీ ఓసీపీ ఫేజ్-2 కోల్మైన్ మంజూరులో రాష్ట్ర మంత్రి వివేక్వెంకటస్వామి కీలకంగా వ్యవహరించారు.
రాష్ట్ర సర్కార్ను ఒప్పించి గనిమంజూరు కాగానే, సింగరేణి యాజమాన్యం అటవీ, పర్యావరణ అనుమతుల కోసం ప్రజాభిప్రాయ సేకరణను పూర్తి చేసింది. అటవీభూముల పర్మిషన్లకు కేంద్ర, రాష్ట్ర అటవీ, పర్యావరణ శాఖలకు నివేదికలు పంపించింది. అయితే వివిధ కారణాలతో అనుమతులు ఆలస్యం కావడంతో మంత్రి వివేక్ వెంకటస్వామి ప్రత్యేక చొరవ తీసుకొని రాష్ట్ర స్థాయి అటవీ అధికారులు, మంచిర్యాల డీఎఫ్వో రాహూల్ కిషన్ జాదవ్, కలెక్టర్ కుమార్ దీపక్, మందమర్రి ఏరియా సింగరేణి జీఎం రాధాకృష్ణతో కలిసి చర్చలు జరిపారు. అనంతరం తుది అనుమతుల కోసం కేంద్ర మంత్రి భూపేందర్యాదవ్ను కలిసారు.
