తిరుమల శ్రీవారి ట్రయల్ రన్ దర్శనాలు ఈ ఉదయం ప్రారంభమయ్యాయి. ఇవాళ్టి( సోమవారం,జూన్-8) నుంచి మూడు రోజుల పాటు ఉద్యోగులు, స్థానికులతో ట్రయల్ రన్ నిర్వహించిన తర్వాత, 11 నుంచి సాధారణ భక్తులు స్వామిని దర్శించుకోవచ్చు. కరోనా వ్యాప్తిని దృష్టిలో ఉంచుకుని మార్చి 3వ వారంలో ఆలయంలో దర్శనాలను నిలిపివేసింది టీటీడీ.
ఈ రోజు నుంచి రూ. 300 దర్శన టికెట్లను భక్తులకు ఆన్ లైన్ లో అందుబాటులోకి తెచ్చింది టీటీడీ. గత వారంలో ఆలయాలు తెరిచేందుకు కేంద్రం అనుమతించిన తర్వాత TTD టీటీడీ భౌతిక దూరం, శానిటైజేషన్ వంటి ఏర్పాట్లు చేసింది. ఇవాళ్టి నుంచి రోజుకు ఆరు వేల మంది చొప్పున మూడు రోజుల పాటు దర్శనాల ట్రయల్ రన్ జరుగనుంది. 11 నుంచి ఇతర ప్రాంతాల భక్తులకు దర్శనం లభించనుంది.
జూన్ నెల ప్రత్యేక దర్శనం టికెట్లను టీటీడీ ఈ ఉదయం వెబ్ సైట్ లో విడుదల చేయనుంది. చిన్న పిల్లలు, వృద్ధులకు దర్శనాలకు ఇంకా అనుమతి లభించలేదు. ఉదయం 6.30 నుంచి రాత్రి 7.30 వరకూ దర్శనాలకు అనుమతించనుండగా, జయ విజయుల వరకూ మాత్రమే… అంటే, మహా లఘు దర్శనాన్ని మాత్రమే చేయించాలని టీటీడీ నిర్ణయించింది. ఇక వీఐపీలు స్వయంగా వస్తేనే అధికారులు దర్శనం చేయిస్తారు. 11 నుంచి ఆన్ లైన్ లో రోజుకు 3 వేలు, తిరుపతిలోని వివిధ సెంటర్లలో టైమ్ స్లాట్ టోకెన్లు పొందే మరో 3 వేల మందికి మాత్రమే దర్శనం ఉంటుంది.
ఇక అనారోగ్యాలకు గురైన వారు తిరుమలకు రావద్దని, వారిని నివారించేందుకు తిరుపతిలోని అలిపిరి దగ్గర థర్మల్ స్క్రీనింగ్, వాహనాల శానిటైజేషన్ ఏర్పాటు చేశామని అధికారులు తెలిపారు. తిరుమలకు వచ్చే భక్తులు వారికి కేటాయించిన సమయంలోనే ఆలయంలోకి రావాలని, ఎవరినీ తాకకుండా ఆలయంలోకి వెళ్లాలని అధికారులు సూచించారు. మంచి నీటి టాప్ లను చేత్తో ఆపరేట్ చేయకుండా లెగ్ ఆపరేటింగ్ సిస్టమ్ ను టీటీడీ అందుబాటులోకి తెచ్చింది.
