- ప్రేయర్లో కండ్లు తిరిగి పడిపోయిన గురుకుల విద్యార్థి
- దవాఖానకు తరలించగాచికిత్స పొందుతూ కన్నుమూత
కొండమల్లేపల్లి, వెలుగు : ఓ గురుకుల స్టూడెంట్ అనుమానాస్పదంగా చనిపోయింది. ఎస్సై వీరబాబు కథనం ప్రకారం..నల్గొండ జిల్లా పెద్దఅడిషర్లపల్లి మండలం అంగడిపేటకు చెందిన ఆంజనేయులు, ఆండాలు దంపతులకు ముగ్గురు బిడ్డలు. రెండో బిడ్డ దాసరి భార్గవి(14) కొండమల్లేపల్లి మండల కేంద్రంలోని ఎస్సీ గురుకుల స్కూల్లో 9వ తరగతి చదువుతోంది. సంక్రాంతి సెలవులకు ఇంటికి వెళ్లిన ఆమె తిరిగి ఆదివారం సాయంత్రం గురుకులానికి వచ్చింది.
సోమవారం ఉదయం ప్రార్థనలో నిలబడగా కండ్లు తిరిగి కిందపడిపోయింది. గమనించిన సిబ్బంది కొండమల్లేపల్లిలోని ఓ ప్రైవేట్ దవాఖానకు తరలించి ప్రథమ చికిత్స చేయించారు. అనంతరం మెరుగైన చికిత్స కోసం దేవరకొండ ప్రభుత్వ ఏరియా హాస్పిటల్కు తరలించారు. అక్కడే చికిత్స పొందుతూ సోమవారం చనిపోయింది. అయితే, తమ కూతురు ఆరోగ్యంగానే ఉందని, ఆకస్మాతుగా చనిపోవడంపై అనుమానాలు ఉన్నాయని స్టూడెంట్తల్లిదండ్రులు అంటున్నారు. మృతురాలి తండ్రి ఆంజనేయులు ఫిర్యాదు మేరకు కేసు నమోదు చేసుకొని దర్యాప్తు చేస్తున్నట్లు ఎస్సై వీరబాబు తెలిపారు.
