న్యూఢిల్లీ: సనాతన ధర్మంపై తమిళనాడు మంత్రి ఉదయనిధి స్టాలిన్ చేసిన కామెంట్లను సుప్రీంకోర్టు తప్పుపట్టింది. మంత్రి హోదాలో ఉన్న వ్యక్తి ఇలాంటి వ్యాఖ్యలు చేయడం సరికాదని ఆగ్రహం వ్యక్తం చేసింది. ‘మీరు చేసిన కామెంట్ల ప్రభావం మీకు తెలియదా?’ అని ప్రశ్నించింది. రాజ్యాంగంలోని వాక్ స్వాతంత్ర్యం, భావప్రకటనా స్వేచ్ఛ, మత స్వేచ్ఛను దుర్వినియోగం చేశారని అసహనం వ్యక్తం చేసింది. ఓ ప్రైవేటు సమావేశం సందర్భంగా ఉదయనిధి మాట్లాడుతూ, సామాజిక న్యాయానికి, సమానత్వానికి సనాతన ధర్మం విరుద్ధమని అన్నారు. దీనికి సంబంధించిన వీడియో వైరల్ కావడంతో బెంగళూరు, పాట్నా, జమ్మూ సహా ఆరు రాష్ట్రాల్లో ఆయనపై ఎఫ్‌‌ఐఆర్‌‌లు నమోదయ్యాయి.
అయితే, ఈ కేసులన్నింటినీ ఒకే రాష్ట్రంలోని హైకోర్టుకు బదిలీ చేయాలంటూ ఉదయనిధి తరఫు లాయర్ పిటిషన్లో కోరారు. మంత్రి ఆరు రాష్ట్రాల హైకోర్టులకు తిరగాల్సి వస్తోందన్నారు. ఈ పిటిషన్పై సుప్రీం కోర్టు సోమవారం విచారించింది. ఒకే కోర్టుకు బదిలీ చేస్తే అప్పుడు కాశ్మీర్కు చెందిన ఒక సాక్షి వేరే రాష్ట్ర కోర్టుకు ఎందుకు పోవాలో కారణాలు చెప్పండని లాయర్ను ప్రశ్నించింది. దీంతో లాయర్ బదులిస్తూ.. అర్నాబ్ గోస్వామి, జుబేర్, నుపుర్ శర్మ కేసుల విషయంలోనూ సుప్రీం కోర్టు గతంలో ఇలాంటి వెసులుబాటు కల్పించిందని గుర్తుచేశారు. కాగా, ఈ కేసులో తదుపరి విచారణను కోర్టు ఈ నెల 15కు వాయిదా వేసింది.
