బిగ్ బాష్ లీగ్ కు రంగం సిద్ధమైంది. ఆస్ట్రేలియాలో జరగబోయే ఈ మెగా లీగ్ మరో నాలుగు రోజుల్లో ప్రారంభం కానుంది. 14 సీజన్ ల పాటు విజయవంతంగా కొనసాగిన ఈ టోర్నీ.. ఆదివారం (డిసెంబర్ 14) నుంచి గ్రాండ్ గా 15వ సీజన్ మొదలు కానుంది. ఈ సారి బిగ్ బాష్ లీగ్ లో స్టార్ క్రికెటర్లు కూడా కనిపించనుండడంతో భారీ హైప్ నెలకొంది. పాకిస్థాన్ మాజీ కెప్టెన్.. టీ20 క్రికెట్ లో వన్ ఆఫ్ ది బెస్ట్ బ్యాటర్ బాబర్ అజామ్ ఆస్ట్రేలియాలో బిగ్ బాష్ లీగ్ లో తొలిసారి ఆడనున్నాడు. బిగ్ బాష్ లీగ్ 2025-26 సీజన్ కోసం బాబర్ సిడ్నీ సిక్సర్స్ తరపున ప్రీ-డ్రాఫ్ట్ ఒప్పందం చేసుకున్నాడు. బాబర్ అజామ్ కు ఇదే తొలి బిగ్ బాష్ లీగ్ కావడం విశేషం.
బిగ్ బాష్ లీగ్ లో బాబర్ అజామ్ '56 నెంబర్ జెర్సీ' ధరించనున్నాడు. ఆస్ట్రేలియా ఫాస్ట్ బౌలర్ మిచెల్ స్టార్క్ కూడా సిడ్నీ సిక్సర్స్ తరపున '56 నెంబర్ జెర్సీ' తో బరిలోకి దిగడం విశేషం. వీరిద్దరూ ఒకే జెర్సీ ధరిస్తారని సిడ్నీ సిక్సర్స్ ఫ్రాంచైజీ ఇప్పటికే ధృవీకరించింది. వీరిద్దరూ ధరించబోయే జెర్సీలో చిన్న మార్పు చోటు చేసుకుంది. 56 నంబర్ను స్టార్క్ వేసుకుంటాడు. బాబర్ అజామ్ జెర్సీకి మాత్రం 056 నెంబర్ జెర్సీతో ఆడతాడు. ఈ ఇద్దరు స్టార్ క్రికెటర్లు ఒకే నెంబర్ జెర్సీ ధరించడం ఒక విశేషమైతే.. ఒకే జట్టుకు ఆడడం మరో విశేషం. మొత్తానికి వీరిద్దరూ ఒకే లీగ్, ఒకే జట్టు, ఒకటే నెంబర్ జెర్సీ కావడంతో ఆసక్తి పెరిగింది.
ఆస్ట్రేలియా స్టార్ బ్యాటర్ స్టీవ్ స్మిత్ కూడా సిడ్నీ సిక్సర్స్ జట్టులో ఉండడం విశేషం. వీరిద్దరూ కలిస్ ఆడితే ఫ్యాన్స్ కు డబుల్ కిక్ ఖాయం. ఇదే జట్టులో బాబర్ అజామ్, స్టీవ్ స్మిత్ లతో పాటు మిచెల్ స్టార్క్ బెన్ డ్వార్షుయిస్, మోయిసెస్ హెన్రిక్స్, సీన్ అబాట్ లాంటి స్టార్ ప్లేయర్లు ఉన్నారు. పాకిస్థాన్ జట్టు తరపున టీ20 ఫార్మాట్ లో ఎన్నో రికార్డ్స్ బ్రేక్ నెలకొల్పిన బాబర్ సిడ్నీ సిక్సర్స్ లో చేరడం తమకు కలిసి వస్తుందని ఆ జట్టు ఫ్రాంచైజీ తెలిపాడు.
టీ20 క్రికెట్లో బాబర్ గణాంకాలు:
బాబర్ అజామ్కు టీ20 క్రికెట్లో అపారమైన అనుభవం ఉంది. తన కెరీర్ లో ఇప్పటివరకు 336 టీ20 మ్యాచ్లు ఆడిన ఈ పాక్ మాజీ కెప్టెన్ 43 యావరేజ్ తో 11 వేలకు పైగా పరుగులు సాధించాడు. అంతర్జాతీ కెరీర్ విషయానికి వస్తే 136 టీ20 మ్యాచ్ ల్లో 4429 పరుగులు చేశాడు. వీటిలో 3 సెంచరీలు.. 38 హాఫ్ సెంచరీలు ఉన్నాయి. ఇప్పటివరకు బాబర్ అజామ్ పాకిస్తాన్ అండర్ 19, సిల్హెట్ రాయల్స్, పాకిస్తాన్, పాకిస్తాన్ ఏ, ఇస్లామాబాద్ యునైటెడ్, రంగ్పూర్ రైడర్స్, కరాచీ కింగ్స్, గయానా అమెజాన్ వారియర్స్, సిల్హెట్ సిక్సర్స్, సోమర్సెట్, డబ్లిన్ చీఫ్స్, టీమ్ వైట్, టీమ్ గ్రీన్, పెషావర్ జల్మి, కొలంబో స్ట్రైకర్స్ జట్ల తరపున ఆడాడు.
