హోలీ అంటే ఇంద్రధనస్సు నేలపైకి వచ్చినట్టే. చిన్నాపెద్దా అందరూ రంగులతో తడిసి ముద్దవుతారు. రంగు నీళ్లు చల్లుకుంటూ సంబురాలు జరుపుకుంటారు. కానీ, కెమికల్స్తో నిండిన ఆ రంగులు ఆరోగ్యానికి అస్సలు మంచివి కావు. అలాగని హోలీకి దూరంగా ఉండలేం కదా! అందుకే ఇంట్లోనే నేచురల్ ఇంగ్రెడియెంట్స్తో కలర్స్ తయారు చేసుకోవాలి. మరి వాటిని ఎలా ప్రిపేర్ చేసుకోవాలంటే..
బయటి నుంచి తీసుకొచ్చే కలర్స్లో సాల్వెంట్స్ ఎక్కువగా ఉంటాయి. వాటివల్ల తామర లాంటి స్కిన్ ఇన్ఫెక్షన్స్ వచ్చే అవకాశాలు ఎక్కువ. అలాగే రంగుల్లో ఉండే కాపర్ సల్ఫేట్ కళ్లకి చాలా డేంజర్. రంగుల్లోని అల్యూమినియం బ్రోమైడ్, మెర్క్యురీ సల్ఫేట్ కూడా చర్మానికి హాని చేస్తాయి. అందుకే వీటికి బదులుగా కెమికల్ ఫ్రీ రంగులతో హోలీ ఆడాలి. వీటి తయారీకి ఎక్కువ ఇంగ్రెడియెంట్స్తో పనిలేదు. శనగపిండి, మైదా లేదా కార్న్ఫ్లోర్లో ఏ ఒక్కటి ఉన్నా చాలు. అయితే ముందుగా టెస్టింగ్ ప్రాసెస్లో కొద్ది మొత్తంలోనే రంగులు చేసుకోవాలి.
పసుపు
ఎనభై శాతం మైదాలో ఇరవై శాతం పసుపు వేయాలి. ఆ మిశ్రమం ఒకదానితో ఒకటి పూర్తిగా కలిసేలా చేతులతో బాగా కలపాలి. తర్వాత ఆ మిశ్రమాన్ని రెండు మూడు సార్లు జల్లెడ పడితే పసుపు రంగు రెడీ. అలాగే ఒకటిన్నర కప్పు నీళ్లలో మూడు టేబుల్ స్పూన్ల పసుపు వేసి మరిగించాలి. నీళ్లు పూర్తిగా చల్లారాక కార్న్ఫ్లోర్ వేసి కలిపినా ఇంట్లోనే పసుపు రంగు తయారవుతుంది.
ఎరుపు
పసుపులో నిమ్మరసం కలిపితే ... దానిలోని ఎసిడిక్ నేచర్ పసుపుని ఎర్రగా మార్చేస్తుంది. ఆ మిశ్రమాన్ని కొన్ని గంటలు గాలి తగిలేచోట ఉంచి..పూర్తిగా ఆరాక చేతులతో పొడి పొడిగా చేయాలి. లేదంటే మిక్సీ అయినా పట్టొచ్చు. ఆ తర్వాత జల్లెడ పడితే హోలీ పండుగకి ఎరుపు రంగు రెడీ. అయితే ఆ మిశ్రమాన్ని ఆరబెట్టేటప్పుడు ఎండ తగలకూడదు. ఎండ తగిలితే రంగు వెలిసిపోతుంది.
గులాబీ
రెండు కప్పుల బీట్రూట్ తురుములో ఒక కప్పు నీళ్లు పోయాలి. నీళ్లు పూర్తిగా గులాబీ రంగులోకి మారే వరకు ఆ మిశ్రమాన్ని చేత్తో బాగా కలపాలి. తర్వాత వడకట్టి...బీట్రూట్ జ్యూస్ వేరు చేయాలి. దాన్ని కార్న్ఫ్లోర్లో కలిపితే గులాబీ రంగు రెడీ. అచ్చు ఎరుపు రంగు ప్రాసెస్లోనే గులాబీ రంగుని కూడా తయారుచేసుకోవచ్చు. కాకపోతే ఈ రంగు కోసం వీలైనంత తక్కువ నిమ్మరసం వాడాలి. పసుపులో కొంచెం నిమ్మరసం కలిపితే గులాబీ రంగు వచ్చేస్తుంది.
ఆకుపచ్చ
మిక్సీజార్లో రెండు కప్పుల కొత్తిమీర, రెండు కప్పుల పాలకూర వేసి కొద్దిగా నీళ్లు పోసి జ్యూస్ పట్టాలి. ఆ మిశ్రమాన్ని వడకట్టి.. అందులో మూడున్నర కప్పుల కార్న్ఫ్లోర్ వేయాలి. ఆ తర్వాత ఒక రోజంతా ఎండబెట్టి మిక్సీ పడితే ఆకుపచ్చ రంగు రెడీ. అలాగే మైదా పిండి, గోరింటాకు పొడిని సమపాళ్లలో తీసుకుని బాగా కలపాలి. ఆ తర్వాత మిక్సీ పడితే గ్రీన్ కలర్ రెడీ.
గోధుమ
రెండు వందల గ్రాముల కాఫీ పౌడర్లో సరిపడా నీళ్లు పోసి మరిగించాలి. నీళ్లు బ్రౌన్ కలర్లోకి మారాక స్టవ్ ఆపేయాలి. పూర్తిగా చల్లారాక కేజిన్నర కార్న్ఫ్లోర్లో దీన్ని వేసి చేతులతో కలపాలి. తర్వాత ఒక రోజంతా ఆరబెట్టి మిక్సీ పడితే కెమికల్ ఫ్రీ బ్రౌన్ కలర్ హోలీకి రెడీ. కావాలనుకుంటే సువాసన కోసం ఈ రంగులో కొద్దిగా అంటే 10 ఎమ్ ఎల్ రోజ్ వాటర్ కూడా కలపొచ్చు.
ఊదా
నాలుగు నుంచి ఐదు బ్లాక్ క్యారెట్స్ తీసుకుని మిక్సీ పట్టి పేస్ట్ చేయాలి. ఆ మిశ్రమంలో 250 గ్రాముల కార్న్ఫ్లోర్ వేసి చేతులతో బాగా కలపాలి. పూర్తిగా ఆరాక చేతులతో పొడి చేసి లేదా మిక్సీ పట్టి ఊదా రంగు రెడీ చేసుకోవచ్చు.
బూడిద రంగు
ఉసిరి కాయలతోనూ కలర్ఫుల్ గ్రే కలర్ తయారుచేయొచ్చు. అదెలాగంటే.. మిక్సీ జార్లో ఉసిరి విత్తనాలు వేసి, కొద్దిగా నీళ్లు పోసి జ్యూస్లా చేయాలి. ఆ జ్యూస్ని కార్న్ఫ్లోర్లో వేసి బాగా కలపాలి. తర్వాత ప్లేట్లో సమంగా పరవాలి. . పూర్తిగా ఆరాక మిక్సీ పడితే గ్రే కలర్ వస్తుంది.
నీలం
ఒక కప్పు నీళ్లలో రెండు టేబుల్ స్పూన్ల నీలం రంగు ఫుడ్ కలర్ వేయాలి. తర్వాత అందులో మూడు కప్పుల కార్న్ఫ్లోర్ వేసి చేతులతో బాగా కలపాలి. కాసేపు ఆరబెడితే నీలి రంగు రెడీ.
కాషాయం
రెండు క్యారెట్స్ని చిన్నచిన్న ముక్కలుగా తరగాలి. వాటిని మిక్సీ జార్లో వేసి సరిపడా నీళ్లు పోసి పేస్ట్ చేయాలి. తర్వాత ఆ మిశ్రమాన్ని చేత్తో పిండి లేదా వడకట్టి జ్యూస్ తీయాలి. దాన్ని కార్న్ఫ్లోర్లో వేసి బాగా కలిపి ఆరబెట్టాలి. తర్వాత మిక్సీ జార్లో వేసి పొడి చేస్తే ఆరెంజ్ కలర్ వచ్చేస్తుంది.
