న్యూఢిల్లీ, వెలుగు: కరీంనగర్లో సైనిక్ స్కూల్ ఏర్పాటుకు కేంద్ర ప్రభుత్వం నిర్ణయం తీసుకుంది. ఎన్జీవోలు, ప్రైవేట్ స్కూల్స్, రాష్ట్ర ప్రభుత్వాల భాగస్వామ్యంతో ఈ స్కూల్ను ఏర్పాటు చేయనుంది. ఈ మేరకు శనివారం రక్షణ మంత్రిత్వ శాఖ నిర్ణయం తీసుకుంది. దేశ వ్యాప్తంగా 21 సైనిక్ స్కూళ్లను స్వచ్ఛంద సంస్థలు, ప్రైవేటు స్కూల్స్, రాష్ట్ర ప్రభుత్వాల భాగస్వామ్యంతో 2022-23 సంవత్సరానికి గాను ఏర్పాటు చేయాలని నిర్ణయించారు. ఈ ఏడాది మే ఫస్ట్ వీక్ నుంచే కొత్తగా ఏర్పాటు కానున్న సైనిక్ స్కూళ్లు ప్రారంభం కానున్నాయి. 6వ తరగతి నుంచి ప్రవేశాలు ఉంటాయని రక్షణ శాఖ తెలిపింది. ఇందులో 40 శాతం మంది విద్యార్థులకు అఖిల భారత సైనిక్ స్కూల్స్ ఎంట్రన్స్ఎగ్జామ్ ద్వారా ప్రవేశాలు కల్పించనున్నారు. ఇప్పటి వరకు అదే స్కూల్లో చదువుతున్న విద్యార్థులకు అర్హత పరీక్ష పెట్టి మిగతా 60 శాతం సీట్లను భర్తీ చేస్తారు. ఏపీలోని కడపలో జిల్లాలో మరో సైనిక్ స్కూల్ను ఏర్పాటు చేయనున్నారు.
