మే వచ్చిందంటే చాలు ఇండియా వేడి అంచుకు చేరిపోతుంది. మధ్యలోకి రాగానే అది తీవ్రమవుతుంది. ఈ ఏడాది వర్షాలు ఆలస్యంగా కురిసే అవకాశం ఉంది. దీంతో వేడి మరింత పెరుగుతోంది. దక్కన్ పీఠభూమిపై ఉన్న తెలంగాణ, విదర్భల్లోనే భానుడు ఉగ్రరూపం చూపిస్తున్నాడు. హిమాలయ అంచుల్లోని రాష్ట్రాలు, కేరళ మినహా దేశం మొత్తం తీవ్రమైన పరిస్థితులు ఉంటాయని హెచ్చరిస్తున్నారు. తెలంగాణలోని రామగుండంలో అధికారికంగా ఇప్పటికే అత్యధికంగా 47.2 డిగ్రీల ఉష్ణోగ్రత నమోదైంది. ఈ ఏడాది దేశంలో నమోదైన అత్యధిక ఉష్ణోగ్రత ఇదే. జగిత్యాల జిల్లాలోని కొల్వాయిలో 47.9 డిగ్రీల ఉష్ణోగ్రత నమోదైంది. అయితే, అది అధికారిక లెక్క కాదు. దీంతో రామగుండమే అధికారిక లెక్కల్లో చేరింది.
హైదరాబాద్లో 42.5 డిగ్రీల అధిక ఉష్ణోగ్రత రికార్డ్ అయింది. ఈ వారం చివర్లో అది 44 డిగ్రీలను తాకే అవకాశం ఉందని నిపుణులు చెబుతున్నారు. ఆంధ్రప్రదేశ్, ఛత్తీస్గఢ్ వంటి 16 రాష్ట్రాల్లో 42 డిగ్రీలకు పైగా ఉష్ణోగ్రత నమోదవుతుందంటున్నారు. రాజస్థాన్లో అయితే 45 దాటుతుందని చెబుతున్నారు. ఇటు విదర్భ, మరఠ్వాడా, మధ్య మహారాష్ట్రల్లోనూ ఉష్ణోగ్రతలు సెగలు కక్కుతున్నాయి. ఈ రీజియన్లోని నాగ్పూర్లో ఎక్కువగా 46.5 డిగ్రీలు నమోదైంది.
సాధారణ ఉష్ణోగ్రత కన్నా 3.1 నుంచి 5 డిగ్రీలు ఎక్కువ ఉష్ణోగ్రత నమోదయ్యే చాన్సులున్నాయి. అయితే, అరేబియా సముద్రం, బంగాళాఖాతంలోని గాలుల ప్రభావంతో ఆంధ్రప్రదేశ్, కర్ణాటక, తమిళనాడుల్లో ఉరుములతో కూడిన వర్షాలు కురుస్తాయని వాతావరణ నిపుణులు చెబుతున్నారు. ఢిల్లీలో రాబోయే మూడు రోజుల్లో 45 డిగ్రీల ఉష్ణోగ్రత రికార్డవుతుందని చెబుతున్నారు. గత నెలలో ప్రపంచంలోని టాప్ వేడి నగరాల జాబితాల్లో ఇండియావే 15 ఉన్నాయి.
