హైదరాబాద్,వెలుగు: ఏప్రిల్లో జరిగే ఇంటర్ ఎగ్జామ్ షెడ్యూల్ మారనున్నది. ఒకే తేదీల్లో జేఈఈ మెయిన్, ఇంటర్ పబ్లిక్ పరీక్షలు ఉండడంతో తేదీలు మార్చనున్నారు. ఏప్రిల్ 20 నుంచి మే 2 వరకు ఇంటర్ పరీక్షలుంటాయని ఫిబ్రవరిలో ఇంటర్ బోర్డు షెడ్యూల్ రిలీజ్ చేసింది. అప్పటికి జేఈఈ మెయిన్ షెడ్యూల్ రాలేదు. అయినా బోర్డు అధికారులు షెడ్యూల్ ఇచ్చారు. తాజాగా మంగళవారం నేషనల్ టెస్టింగ్ ఏజెన్సీ (ఎన్టీఏ) జేఈఈ మెయిన్ షెడ్యూల్ రిలీజ్ చేసింది. దీంట్లో ఏప్రిల్16 నుంచి 21 వరకు ఫస్ట్ సెషన్ ఎగ్జామ్ ఉంటుందని తెలిపింది. దీంతో ఏప్రిల్ 20న ఇంటర్ సెకండ్ లాంగ్వేజీ పేపర్–1, 21న సెకండ్ లాంగ్వేజీ పేపర్–2 పరీక్షలున్నాయి. దీంతో ఈ 2 పరీక్షల షెడ్యూల్ మార్పు జరగనుంది. జేఈఈ ప్రిపరేషన్ కోసం స్టూడెంట్లకు కొంత టైం ఇస్తారా లేక ఈ 2 ఎగ్జామ్స్ మాత్రమే చివర్లో నిర్వహిస్తారా? అనేదానిపై బోర్డు నిర్ణయం తీసుకోవాల్సి ఉంది. దీనిపై ఇవ్వాలో రేపో నిర్ణయం రానుంది.
