హైదరాబాద్/తిమ్మాపూర్, వెలుగు: జేఈఈ మెయిన్ ఎగ్జామ్స్ నిర్వహణ గందరగోళంగా మారింది. రాష్ట్రంలోని పలు సెంటర్లలో సర్వర్ ప్రాబ్లమ్తో పరీక్షలు ఆలస్యంగా ప్రారంభమయ్యాయి. దీంతో స్టూడెంట్లు తీవ్ర ఇబ్బందులు పడ్డారు. హైదరాబాద్లోని ఓ సెంటర్లో ఏకంగా సెకండ్ సెషన్ ఎగ్జామ్ రద్దు చేశారు. అయితే సమస్య గురించి స్టూడెంట్లకు, పేరెంట్స్కు చెప్పకపోవడంతో వారంతా సెంటర్ల వద్ద ఆందోళనలకు దిగారు. దేశవ్యాప్తంగా ఈ నెల 23 నుంచి జేఈఈ మెయిన్ పరీక్షలు ప్రారంభమయ్యాయి. ఉదయం 9 నుంచి12 వరకూ ఫస్ట్ షిప్ట్, మధ్యాహ్నం 3 నుంచి 6 వరకూ సెకండ్ షిఫ్ట్ పరీక్ష ఉంటుంది. అయితే శుక్రవారం హైదరాబాద్, కరీంనగర్ జిల్లాల్లోని పలు సెంటర్లలో సర్వర్ ప్రాబ్లమ్ తో పరీక్ష ఆలస్యంగా ప్రారంభమైంది. అబిడ్స్ లోని అరోరా ఇంజినీరింగ్ కాలేజీలో ఉదయం 9కి ప్రారంభం కావాల్సిన పరీక్ష, స్కానింగ్ ప్రాబ్లమ్తో గంటన్నర ఆలస్యంగా 10.30కు మొదలైంది. ఎగ్జామ్ హాల్లో సర్వర్ సమస్యతో కంప్యూటర్లు మొరాయించాయి. 90 ప్రశ్నల్లో 29 క్వశ్చన్లు స్ర్కీన్ పై కనిపించలేదని ఇన్విజిలేటర్కు చెప్పినా, పట్టించుకోలేదు. మధ్యాహ్నం రెండో సెషన్ లోనూ ఇదే సమస్య ఎదురైంది. క్వశ్చన్ పేపర్ ఓపెన్ కాకపోవడంతో స్టూడెంట్లు తీవ్ర ఇబ్బందులు పడ్డారు. సాయంత్రం 6 వరకూ సరిచేసేందుకు సాధ్యం కాకపోవడంతో ఎగ్జామ్ వాయిదా వేస్తున్నట్టు అధికారులు ప్రకటించారు. దీంతో విద్యార్థులు, పేరెంట్స్ ఆందోళనకు దిగారు. పోలీసులు పేరెంట్స్ను అదుపులోకి తీసుకున్నారు. మలక్పేటలోని మూసారంబాగ్లోని అరోరా పీజీ కాలేజీలోనూ ఇదే సమస్య ఎదురైంది. ఉదయం 9కి ప్రారంభం కావాల్సిన పరీక్షను మధ్యాహ్నం 12.30కు ప్రారంభించారు. ఈ సమస్యపై ఎన్టీఏ టోల్ ఫ్రీ నెంబర్లకు ఫిర్యాదు చేసినా పట్టించుకోలేదని పేరెంట్స్ వాపోయారు.
కరీంనగర్లోనూ..
కరీంనగర్ జిల్లా తిమ్మాపూర్లోని పలు సెంటర్లలోనూ జేఈఈ పరీక్షల నిర్వహణ అస్తవ్యస్తంగా మారింది. సర్వర్ ప్రాబ్లమ్తో మండలంలోని వాగేశ్వరి కాలేజ్ ఆఫ్ ఇంజినీరింగ్, శ్రీ చైతన్య కాలేజ్ ఆఫ్ ఇంజినీరింగ్ పరీక్ష కేంద్రాల్లో ఎగ్జామ్ 40 నిమిషాలు ఆలస్యంగా మొదలైంది.
