- రైఫిల్, బుల్లెట్లు, గొడ్డలి స్వాధీనం
- జగిత్యాల జిల్లా పెగడపల్లిలో ఘటన
- నిందితుడి కొడుకు ములుగు జిల్లాలో డీఎస్పీ
- కేసు వివరాలు వెల్లడించిన జగిత్యాల డీఎస్పీ రఘుచందర్
పెగడపల్లి (జగిత్యాల), వెలుగు: జగిత్యాల జిల్లాలో జాతీయ పక్షి నెమలిని గన్తో షూట్ చేసి చంపిన ఇద్దరు నిందితులను అరెస్ట్ చేసి రిమాండ్కు పంపినట్టు డీఎస్పీ రఘుచందర్ తెలిపారు. వారి నుంచి గన్, బుల్లెట్లు, గొడ్డలితో పాటు నెమలి కళేబరాన్ని స్వాధీనం చేసుకున్నామన్నారు. పెగడపల్లి పోలీస్ స్టేషన్లో ఏర్పాటు చేసిన మీడియా సమావేశంలో కేసుకు సంబంధించిన వివరాలను డీఎస్పీ మంగళవారం వెల్లడించారు. కరీంనగర్ జిల్లా గంగాధర మండలం లక్ష్మిదేవిపల్లికి చెందిన నలువాల సత్యనారాయణ.. జగిత్యాల జిల్లా పెగడపల్లి మండలం దోమలకుంట గ్రామ శివారులో గన్తో నెమలిని వేటాడాడు.
తర్వాత దాన్ని తన కారులో తరలించే ప్రయత్నం చేశాడు. పోలీసులకు సమాచారం అందడంతో అయితుపల్లి గ్రామ శివారులో తనిఖీలు చేపట్టారు. కారులో నుంచి నెమలి కళేబరాన్ని గుర్తించి స్వాధీనం చేసుకున్నారు. కారు డ్రైవర్గా వచ్చిన జవ్వాజి రాజును కూడా పోలీసులు అదుపులోకి తీసుకున్నారు. నిందితుడు సత్యనారాయణ 2017లో భూపాలపల్లి జిల్లా మహాదేవపూర్లో జింకలను వేటాడిన కేసులో అరెస్ట్ అయ్యాడు. తర్వాత బెయిల్పై బయటికొచ్చాడు. మళ్లీ తాజాగా నెమలిని చంపి తరలిస్తుండగా పట్టుబడ్డాడు.
సత్యనారాయణ వద్ద నుంచి 0.22 స్పోర్టింగ్ రైఫిల్ గన్, 34 బుల్లెట్లు, గొడ్డలి, కారును పోలీసులు స్వాధీనం చేసుకున్నారు. ఇద్దరిని అరెస్ట్ చేసి రిమాండ్కు పంపినట్టు డీఎస్పీ రఘుచందర్ తెలిపారు. కాగా, నిందితుడు సత్యనారాయణ కొడుకు ములుగు జిల్లాలో డీఎస్పీ స్థాయిలో విధులు నిర్వహిస్తున్నాడు. నిందితులను పట్టుకున్న మల్యాల సీఐ నీలం రవి, ఎస్సై రామకృష్ణ, ఏఎస్సై సత్తయ్య, సిబ్బందిని ఎస్పీ సన్ప్రీత్‌ సింగ్ ను అభినందించారు.
