బీజేపీలో మిగిలిన రెండు ఎంపీ సీట్లు కొత్తవారికే!

•      వచ్చే లిస్టులో అధికారికంగా ప్రకటించే చాన్స్​

హైదరాబాద్, వెలుగు: బీజేపీలో మిగిలిన రెండు ఎంపీ స్థానాలకు అభ్యర్థుల ఎంపిక దాదాపు కొలిక్కి వచ్చినట్టు తెలిసింది. ఆ రెండు సీట్లను కొత్తవారికే ఇచ్చే యోచనలో బీజేపీ అధిష్టానం ఉన్నట్టు సమాచారం. మొత్తం17 స్థానాలకు గాను15 స్థానాల్లో అభ్యర్థులను బీజేపీ ప్రకటించింది. మిగిలిన వరంగల్, ఖమ్మం సీట్లపై కొంతకాలంగా కసరత్తు నడుస్తోంది. ఇటీవలే బీజేపీలో చేరిన మాజీ ఎమ్మెల్యే ఆరూరి రమేశ్​కు వరంగల్ సీటు దాదాపు కన్ఫామ్ కాగా, ఖమ్మం సీటుపై మాత్రం స్పష్టత రాలేదని తెలుస్తోంది. 

బీఆర్ఎస్ నుంచి బీజేపీలోకి వచ్చిన జలగం వెంకట్రావ్ కు ఆ సీటు ఇస్తారనే ప్రచారం జరిగినా.. ఆ తర్వాత మరో సీనియర్ నేత బీజేపీలో చేరుతున్నారని, ఆయనకే ఆ సీటు కేటాయించే అవకాశం ఉందనే వాదనలూ వినిపిస్తున్నాయి. అందుకే ఆ సీటును ప్రకటించలేదని కొందరు నేతలు చెప్తున్నారు. అయితే, తర్వాతి లిస్టులో ఈ రెండు సీట్లకు అభ్యర్థులను ప్రకటిస్తారని బీజేపీ వర్గాలు పేర్కొంటున్నాయి. 

బీజేపీ నేతలను కలిసిన జలగం..

ఖమ్మం సీటు ఆశిస్తున్న జలగం వెంకట్రావ్ మంగళవారం బీజేపీ ఆఫీసుకు వచ్చారు. పార్టీ ఆర్గనైజింగ్ జనరల్ సెక్రటరీ చంద్రశేఖర్​తో భేటీ అయ్యారు. అనంతరం ఆయన మాట్లాడుతూ.. బీజేపీ నేతలను తాను మర్యాదపూర్వకంగా కలవడానికే వచ్చానని చెప్పారు. టికెట్ ఎందుకు ఆగిందనేది చెప్పేది తాను కాదని.. పార్టీ నేతలు చెప్పాలని అన్నారు. ఈ మధ్యనే జాయిన్ అయిన తాను పార్టీ గురించి మాట్లాడటం సరికాదని, సరైన సమయంలో పార్టీ టికెట్ అనౌన్స్  చేస్తుందని చెప్పారు. ఖమ్మం టికెట్ టీడీపీకి ఇస్తారనే చర్చ పార్టీలో లేదన్నారు.