ఓటమెరుగని ఖాకీ..
ఒక్కటి తప్ప అన్నికేసులూ సక్సెస్
ఒకటా.. రెండా.. వెయ్యి మిస్సింగ్ కేసులు.. ఫెయిల్యూర్ అన్న మాట ఎరుగడు. చేసిన ప్రతి మిషన్ సక్సెస్. అందుకే ఆ పోలీస్ను ముంబై షెర్లాక్ హోమ్స్ అంటున్నారు. మిస్సింగ్ కేసు వచ్చిందంటే ముంబై పోలీసులకు కనపడే వ్యక్తి, వినపడే పేరు హెడ్కానిస్టేబుల్ రాజేశ్ పాండే. అవును మరి, 2005 నుంచి ఇప్పటిదాకా ఆయన వెయ్యి మిస్సింగ్ కేసులను పరిష్కరించారు. ఒక్క కేసు తప్ప మిగతా అందరినీ తమ తమ ఇళ్లకు పంపించేలా చూశారు. చెప్పాలంటే ఆయన కథ ఆధారంగా ఓ సినిమానే తీసేయొచ్చంటే ఆశ్చర్యపోవాల్సిన అవసరం లేదు. అందుకే బాలీవుడ్ డైరెక్టర్ సినిమా తీసేందుకు ముందుకొచ్చాడు. పోలీసుల పర్మిషన్ తీసుకున్నాడు.
అబ్బాయి మిస్సింగ్ కేసుతో స్టార్ట్
2011లో ఓ అబ్బాయి మిస్సింగ్ కేసుతో స్టార్ట్ అయింది రాజేశ్ పాండే సక్సెస్. తన సొంత తండ్రి చేతిలోనే (భార్య నుంచి విడిపోయాక) కిడ్నాప్ అయిన అబ్బాయిని రక్షించారు రాజేశ్ పాండే. ఆ కేసును పరిష్కరించేందుకు ఎన్నో ప్రయాసలు పడ్డారు. తన స్కిల్స్ అన్నీ వాడి ఆ అబ్బాయి జాడ కనుక్కున్నారు. ఇక, అక్కడి నుంచి ఆయన వెనుదిరిగి చూసుకున్న సందర్భాలు అరుదు. ‘‘వేరే నేరాలతో పోలిస్తే మిస్సింగ్ పర్సన్స్ కేసులను పరిష్కరించడం, ప్రత్యేకించి పిల్లలను కాపాడడమే నాకు ముఖ్యం” అని రాజేశ్ పాండే చెబుతారు. ఆయన పనితనం నచ్చి ముంబై రిటైర్డ్ పోలీస్ కమిషనర్ దత్త పాదసాల్గికర్, ‘పాండే మాడ్యూల్’ను పెట్టారు. అంటే, మిస్సింగ్ కేసులను విచారించే ఏ అధికారి అయినా ఆయన ఫాలో అయ్యే పద్ధతులను పాటించడం దాని ఉద్దేశం.
కొరియర్బాయ్గా వేషం
కేసులను సాల్వ్ చేసేందుకు రాజేశ్ పాండే అందరితోనూ పరిచయాలు పెంచుకుంటారు. స్థానికంగా ఉండే దర్జీలు, గెస్ట్హౌస్ ఓనర్లు, బార్ ఉద్యోగులతో పరిచయాలు ఉంటాయి. 2014లో ఓ ఇంట్లో పనిచేసే అమ్మాయి మిస్సింగ్ కేసును కొరియర్బాయ్గా వేషం కట్టి పరిష్కరించారు ఆయన. ఆ అమ్మాయి మిస్సయ్యాక ఏ ఒక్క క్లూ కూడా దొరకలేదు. అయితే, ఓ రోజు సడన్గా ఆ అమ్మాయి తను పనిచేసే యజమానులకు ఫోన్ చేసింది. ఆమె ఫోన్ చేసిన నంబర్ ఆధారంగా పశ్చిమబెంగాల్లోని 24 పరగణాస్లో ఉన్నట్టు గుర్తించారు. ఆ నంబర్ రిజిస్టర్ అయిన అడ్రస్కు వెళ్లారు. అయితే, తప్పుడు అడ్రస్ పెట్టి ఆ నంబర్ తీసుకున్నట్టు గుర్తించారు. వెంటనే ఓ ఆలోచన చేశారు రాజేశ్ పాండే. ఆ అమ్మాయి యజమానులను కలిశారు. ఆ అమ్మాయి ఫోన్ చేసిన నంబర్కు మళ్లీ ఫోన్ చేయించారు. కొరియర్ కంపెనీ నుంచి మాట్లాడుతున్నాం.. ఓ కొరియర్ వచ్చింది. పూర్తి అడ్రస్ కావాలని ఆ ఫోన్ లిఫ్ట్ చేసిన వ్యక్తికి చెప్పించారు. వెంటనే ఆ వ్యక్తి అడ్రస్ ఇచ్చాడు. రాజేశ్ పాండే కొరియర్ బాయ్గా వేషం కట్టి ఆ అడ్రస్కు వెళ్లారు. ఆ అమ్మాయికి బలవంతపు పెళ్లి చేస్తున్న విషయాన్ని గుర్తించారు. వెంటనే అమ్మాయిని రక్షించారు. 26 ఏళ్ల కెరీర్లో ఇలాంటి ఎన్నో కష్టమైన కేసులను ఆయన పరిష్కరించి తోటి పోలీసులకు స్ఫూర్తిగా నిలిచారు. తన కమ్యూనికేషన్ స్కిల్స్, సోషల్ నాలెడ్జ్ను వాడుకుని కేసులను పరిష్కరించగలిగానని రాజేశ్ పాండే చెబుతారు.
