- యువతిని వేధించేలా నిందితుడిని ప్రోత్సహించిన అతడి తల్లి, అక్క
జైపూర్, వెలుగు: మంచిర్యాల జిల్లా జైపూర్మండలంలోని టేకుమట్లకు చెందిన యువతి గోషిక మాధవి సూసైడ్ నోట్ రాసి ఆత్మహత్య చేసుకున్న కేసులో ప్రధాన నిందితుడు గోనె వెంకటేశ్తో పాటు అతడి తల్లి శంకరమ్మ, అక్క శైలజను మంగళవారం జైపూర్ పోలీసులు అరెస్ట్ చేశారు. మీడియా సమావేశం ఏర్పాటు సీఐ నవీన్ కుమార్, ఎస్సై భూమేశ్ వివరాలు వెల్లడించారు. మాధవికి రెండేళ్ల క్రితం వెంకటేశ్తో స్నేహం ఏర్పడింది. దాన్ని ప్రేమగా భావించిన వెంకటేశ్.. మాధవి వెంట పడ్డాడు. ఆమె తిరస్కరించినా పెండ్లి చేసుకోవాలని వేధించాడు. యువతిని వదలకుండా వేధిస్తే చివరకు పెండ్లి చేసుకుంటుందని వెంకటేశ్ను తల్లి శంకరమ్మ, అక్క శైలజ ప్రోత్సహించారు.
ఆ ముగ్గురూ కలిసి యువతి ఇంటికి వెళ్లి పెండ్లి చేయాలని కోరగా.. వారు నిరాకరించారు. అయితే పెండ్లి చేయకపోతే ఆమె పేరుతో తాను ఆత్మహత్య చేసుకుంటానని బెదిరించాడు. ఈ నెల 10 గోదావరిఖనిలో మాధవిని కలసి మళ్లీ ఒత్తిడి చేసి, అంగీకరించకపోతే తీవ్ర పరిణామాలు ఉంటాయని హెచ్చరించడంతో మరుసటి రోజున పెద్దల సమక్షంలో పంచాయితీ నిర్వహించారు. ఆ క్రమంలో నిందితుడి తల్లి, అక్క కలిసి వెంకటేశ్కు ఏదైనా జరిగితే ఊరుకోమని బెదిరించారు. దీంతో మనస్తాపం చెందిన మాధవి ఆత్మహత్యకు పాల్పడినట్లు సీఐ తెలిపారు. ముగ్గురు నిందితులను అరెస్ట్ చేసి కోర్టులో హాజరు పరిచినట్లు చెప్పారు.
