నర్సంపేట, వెలుగు: వరంగల్ రూరల్జిల్లాలోని నర్సంపేట మండలంలో 11 ఎంపీటీసీ స్థానాలుండగా కాంగ్రెస్ 6, టీఆర్ఎస్5 స్థానాలు గెలిచాయి. ఎంపీపీ స్థానాన్ని ఎలాగైనా కైవసం చేసుకోవాలనుకున్న టీఆర్ఎస్ సీనియర్నాయకులు ముగ్గురు కాంగ్రెస్ఎంపీటీసీల మద్దతు కూడగట్టారు. దీంతో టీఆర్ఎస్ నాయకురాలు మోతే కళమ్మ ఎంపీపీగా ఎన్నికైంది. కాంగ్రెస్నుంచి టీఆర్ఎస్ లో చేరిన బంజీపేట ఎంపీటీసీ అజ్మీర మౌనిక వైస్ఎంపీపీగా ఎన్నికైంది.
తీవ్ర ఉద్రిక్తత
ఎంపీపీ ఎన్నికకు పూర్తి ఆధిక్యం ఉండడంతో కాంగ్రెస్ నాయకులు హైదరాబాద్లో క్యాంపు నిర్వహించారు. టీఆర్ఎస్ ఐదుగురు సభ్యులతో క్యాంపు నిర్వహిస్తూనే కాంగ్రెస్ ఎంపీటీసీలకు గాలం వేసింది. దీంతో మొదట బాంజిపేట ఎంపీటీసీ అజ్మీర మౌనిక టీఆర్ఎస్ ఎమ్మెల్యే పెద్ది సుదర్శన్ రెడ్డి క్యాంపు కార్యాలయానికి చేరుకుంది. ఆమె బాటలో రాజుపేట ఎంపీటీసీ వీరన్న సైతం ఎమ్మెల్యే కార్యాలయానికి చేరుకున్నారు. మరోవైపు అజ్మీర మౌనిక భర్త తనకు, తన భార్యకు కాంగ్రెస్ నాయకులతో ప్రాణభయం ఉందని గురువారం రాత్రి నర్సంపేట టౌన్ పోలీస్ స్టేషన్లో ఫిర్యాదు చేశారు. లక్నెపెల్లి ఎంపీటీసీ ఒల్లేరావు రజిత కాంగ్రెస్ పార్టీ క్యాంపులో ఉండగానే ఆమె భర్త బుచ్చయ్య తన భార్య రజితను కిడ్నాప్ చేశారని పోలీసులకు ఫిర్యాదు చేశారు. దీంతో టౌన్ ఎస్సై నాగనాథ్కాంగ్రెస్ కార్యాలయంలో ఉన్న రజితను పోలీస్స్టేషన్కు తరలించారు. అనంతరం భర్త బుచ్చయ్యకు ఆమెను అప్పగించగా టీఆర్ఎస్ వాహనంలో తీసుకెళ్తుండగా కాంగ్రెస్ పార్టీ కార్యకర్తలు ఒక్కసారిగా చెప్పులతో రజిత, టీఆర్ఎస్ నాయకులపై దాడులు చేశారు. పోలీసులు లాఠీచార్జి చేసి పరిస్థితిని చక్కదిద్దారు. ఆగ్రహించిన కాంగ్రెస్నాయకులు పోలీస్స్టేషన్ఎదురుగా ఉన్న ప్రధాన రహదారిపై రాస్తారోకో చేశారు.
