హైదరాబాద్, వెలుగు: దేశీయ ఆయిల్‌‌‌‌పామ్ రైతుల ప్రయోజనాలకు విఘాతం కలిగించేలా ముడి పామాయిల్ దిగుమతి సుంకాన్ని తగ్గిస్తూ కేంద్ర ప్రభుత్వం తీసుకున్న నిర్ణయాన్ని రాష్ట్ర వ్యవసాయ శాఖ మంత్రి తుమ్మల నాగేశ్వరరావు తప్పుబట్టారు. ఒకవైపు రైతులను ఆయిల్‌‌‌‌పామ్ సాగువైపు ప్రోత్సహిస్తూనే, మరోవైపు విదేశీ పామాయిల్ దిగుమతులకు సుంకం తగ్గించడం వల్ల దేశీయ రైతుల ఉత్పత్తుల ధరలపై తీవ్రమైన ఒత్తిడి పడే ప్రమాదం ఉందని గురువారం ఓ ప్రకటనలో ఆందోళన వ్యక్తం చేశారు.
విదేశీ పామాయిల్‌‌‌‌కు రాయితీలిస్తే మన రైతుల పరిస్థితి ఏంటి? అని ప్రశ్నించారు. క్రూడ్ పామ్ ఆయిల్ పై మొత్తం దిగుమతి సుంకాన్ని 16.5 శాతం నుంచి 11 శాతానికి తగ్గించడం వల్ల దిగుమతులకు పోటీ ప్రయోజనం పెరుగుతుందని, ఇది ఆయిల్‌‌‌‌పామ్ గెలల (ఎఫ్ఎఫ్బీ) ధరలపై ప్రతికూల ప్రభావం చూపుతుందని మంత్రి పేర్కొన్నారు.
