అల్లూరి సీతారామరాజు జిల్లా అరకులోయలో జరిగిన ఘోర రోడ్డు ప్రమాదంలో మృతుల సంఖ్య ఐదుకు చేరింది. 2024, మార్చి 9వ తేదీ శనివారం ఉదయం అరకులోయ మండలం గన్నెల రహదారిలో నందివలస గ్రామం సమీపంలో రెండు బైక్‌లు ఒకదానికొకటి ఢీకొన్నాయి. ఈ ప్రమాదంలో తీవ్రంగా గాయపడిన ఐదుగురు మృతిచెందారు. ఇందులో ముగ్గురు ఘటనాస్థలంలోనే ప్రాణాలు కోల్పోగా.. మరో ఇద్దరు అరకులోయ ఏరియా ఆసుపత్రిలో చికిత్స పొందుతూ మరణించారు.
బైక్ లపై జాతరకు వెళ్లి వస్తుండగా ఈ ప్రమాదం జరిగినట్లు తెలుస్తోంది. మృతులను చినలబుడు ప్రాంతానికి చెందిన బురిడీ హరి, గొల్లూరి అమలాకాంత్, లోతేరుకు చెందిన త్రినాధ్, భార్గవ్ లుగా పోలీసులు గుర్తించారు. ఈ ఘటనపై కేసు నమోదు చేసి దర్యాప్తు చేస్తున్నట్లు పోలీసులు తెలిపారు.
