అమెరికా టూర్కు కిషన్ రెడ్డి
అంతర్జాతీయ హై లెవల్ పొలిటికల్ ఫోరమ్ సదస్సుకు ఇయ్యాల హాజరు
జీ-20 దేశాల టూరిజం గ్రూప్ చైర్ హోదాలో ప్రసంగం
హైదరాబాద్, వెలుగు : కేంద్ర మంత్రి కిషన్ రెడ్డి బుధవారం అమెరికా వెళ్లారు. న్యూయార్క్‌‌లోని ఐక్యరాజ్యసమితి ప్రధాన కార్యాలయంలో అంతర్జాతీయ ‘హై లెవల్ పొలిటికల్ ఫోరమ్ (హెచ్‌‌ఎల్‌‌పీఎఫ్)’ ఆధ్వర్యంలో జరగనున్న సమావేశంలో ఆయన ప్రధాన వక్తగా ప్రసంగించనున్నారు. ఈ నెల 13, 14 తేదీల్లో జరగనున్న ఈ సమావేశంలో ప్రపంచంలోని వివిధ దేశాల ప్రజా ప్రతినిధులు, ప్రముఖ పారిశ్రామికవేత్తలు పాల్గొంటారు. ఇప్పటివరకు ఈ అవకాశం దక్కిన తొలి భారత పర్యాటక శాఖ మంత్రి కిషన్ రెడ్డి కావడం గమనార్హం. మన దేశం జీ-20 సమావేశాలను నిర్వహిస్తున్న నేపథ్యంలో.. కేంద్ర పర్యాటక మంత్రిగా, ‘జీ-20 దేశాల టూరిజం చైర్’ హోదాలో కిషన్ రెడ్డి ఈ అంతర్జాతీయ సమావేశాలను ఉద్దేశించి ప్రసంగించనున్నారు.
ఇటీవల గోవాలో జీ-20 దేశాల పర్యాటక మంత్రులు, తొమ్మిది ప్రత్యేక ఆహ్వానిత దేశాల మంత్రుల సమావేశాలు విజయవంతంగా జరిగాయి. ఈ సందర్భంగా ఇండియా చేసిన ప్రతిపాదనలను సభ్యదేశాలు, ఆతిథ్య దేశాల మంత్రులు ఏకగ్రీవంగా ఆమోదించారు. దీంతో ‘పర్యాటక రంగంలో సుస్థిరాభివృద్ధి లక్షాలను చేరుకోవడం, అత్యవసర కార్యాచరణ కోసం ప్రపంచ దేశాలను, వివిధ భాగస్వామ్య పక్షాలను (వ్యాపార సంస్థలు) ఏకం చేయాల్సిన ఆవశ్యకత’ థీమ్తో రెండు రోజుల పాటు ఈ సమావేశాలు జరగనున్నాయి. అత్యంత ప్రాధాన్యతతో కూడిన అంతర్జాతీయ వేదికలో ప్రధాన వక్తగా కేంద్ర పర్యాటక మంత్రి హోదాలో కిషన్ రెడ్డికి అరుదైన అవకాశం రావడంతో బీజేపీ శ్రేణులు హర్షం వ్యక్తం చేశాయి. ఈ సమావేశాలకు వెళ్లే ముందు కిషన్ రెడ్డి బుధవారం ఉదయం సతీసమేతంగా అంబర్పేట మహంకాళి అమ్మవారిని దర్శించుకొని ప్రత్యేక పూజలు చేశారు.
