- చైనాకు రాజ్ నాథ్ సింగ్ ప్రశ్న
నమ్సాయ్: అరుణాచల్ ప్రదేశ్లోని కొన్ని ప్రాంతాల పేర్లు మార్చుతూ చైనా ఓ ప్రకటన రిలీజ్ చేయడంపై కేంద్ర మంత్రి రాజ్ నాథ్ సింగ్ విమర్శించారు. చైనాలోని వివిధ రాష్ట్రాల పేర్లను మారిస్తే అవి ఇండియాలో భాగమవుతాయా అని ప్రశ్నించారు. మంగళవారం అరుణాచల్ ప్రదేశ్ నమ్సాయ్లో జరిగిన బీజేపీ ఎన్నికల ర్యాలీలో రాజ్ నాథ్ మాట్లాడారు.
అరుణాచల్ ప్రదేశ్లో 30 ప్రాంతాల పేర్లను మార్చాలన్న చైనా ఎత్తుగడ క్షేత్రస్థాయి పరిస్థితులను మార్చదని తెలిపారు. అరుణాచల్ అనేది ఇండియాలో అంతర్భాగమని చెప్పారు. ‘‘చైనాలోని వివిధ రాష్ట్రాల పేర్లను మేం మారిస్తే అవి ఇండియాలో భాగమవుతాయా అని ఆ దేశాన్ని నేను ప్రశ్నించాలనుకుంటున్నాను? ఇలాంటి చర్యలతో దౌత్య సంబంధాలు క్షీణిస్తాయి. పొరుగుదేశాలతో సత్సంబంధాలను కొనసాగించాలని అనుకుంటున్నాము. కానీ, మా ఆత్మగౌరవానికి హాని తలపెట్టాలని ఎవరైనా ప్రయత్నిస్తే తగిన జవాబిచ్చే సత్తా ఇండియాకు ఉంది” అని రాజ్ నాథ్ సింగ్ హెచ్చరించారు.
