టీ... అనేది ఈజీ బిజినెస్ ఆప్షన్ అయింది చాలామందికి. చదువుతో పనిలేకుండా టీ సెంటర్ పెడుతున్నారు కొందరు. కొందరేమో చదువుకుంటూనే టీ స్టాల్ నడిపిస్తున్నారు. కొత్తగా టీ ఫ్రాంఛైజీలు వచ్చాయి కూడా. కానీ, ఈమె టీ తయారుచేయడం వెనక ఒక రీజన్ ఉంది. అదేంటంటే.. వాళ్ల ఊళ్లో టూరిజాన్ని ప్రమోట్ చేయడం. ఆ ఆలోచన ఆమెను గిన్నిస్ వరల్డ్ రికార్డుల్లోకి ఎక్కించింది. దక్షిణాఫ్రికాకు చెందిన ఈమె పేరు ఇంగార్ వాలెంటిన్.
దక్షిణాఫ్రికాలోని పర్వత ప్రాంతంలో ఉంది ఉప్పెర్తలో అనే ఊరు. ‘రాయ్బోస్ టీ’ కి ఈ ఊరు చాలా ఫేమస్. ఎరుపు రంగులో ఉండే ఈ టీ ఒక హెర్బల్ టీ. 2018లో కార్చిచ్చు కారణంగా ఆ ఊరివాళ్ల ఇండ్లు, గెస్ట్హౌస్లు నేలమట్టమయ్యాయి. వాటిలో వాలెంటిన్ చిన్నప్పుడు ఉన్న ఇల్లు కూడా ఉంది. ఆమె ఉద్యోగం చేసే టూరిజం ఆఫీస్ కూడా దెబ్బతిన్నది. అంతేకాదు అక్కడి ప్రజలకు ఆదాయం తెచ్చిపెట్టే ‘రాయ్బోస్’ టీ తోటలు కూడా పూర్తిగా కాలిపోయాయి. ఆ కార్చిచ్చు వల్ల ఒకప్పుడు టూరిస్ట్ల హబ్గా ఉన్న ఆ ఊరు కళతప్పిపోయింది. మళ్లీ అక్కడ కొత్త ఇండ్లు, టీ తోటలు తయారయ్యేందుకు నాలుగేండ్లు పట్టింది. దాంతో టూరిస్ట్లని మళ్లీ తమ ఊరికి రప్పించాలనుకుంది వాలెంటిన్. టీ పెట్టడంలో ఎక్స్పర్ట్ అయిన ఆమె వెరైటీగా టీ చేయాలను కుంది. తమ ఊళ్లో ఎక్కువగా పెరిగే అస్పలాతస్ లీనియరిస్ అనే టీ మొక్క ఆకుల నుంచి ఈ టీ తయారుచేసింది. దీని తయారీలో ఒరిజినల్, వెనిలా, స్ట్రాబెర్రీ అనే మూడు రకాల ఫ్లేవర్స్ వాడింది వాలెంటిన్.
నిమిషానికి నాలుగు కప్పుల టీ
ఒక్కో కెటిల్లో 4 టీ బ్యాగ్స్ వేసింది వాలెంటిన్. రాయ్బోస్ టీ రుచిగా రావడం కోసం టీ బ్యాగ్స్ని రెండు నిమిషాలు వేడినీళ్లలో పెట్టింది. అలా నిమిషానికి 4 టీల చొప్పున తయారు చేసింది వాలెంటిన్. ‘‘కార్చిచ్చు వల్ల అందరం అన్నీ కోల్పోయాం. మా ఊళ్లో చాలామంది రాయ్బోస్ టీ తోటల్ని నమ్ముకున్నారు. వాళ్లకు భరోసా ఇచ్చేందుకు గంటలో150 కప్పుల టీ తయారు చేయాలను కున్నా. కానీ, 249 కప్పుల టీ చేయడం నాకే ఆశ్చర్యంగా అనిపిం చింది”అంది వాలెంటిన్.