- పలు మండలాల పార్టీ ప్రెసిడెంట్లు, అనుబంధ సంఘాల ప్రతినిధులు కూడా
- పార్టీ నేతలపై తీవ్రస్థాయిలో విమర్శలు
- రేబల్గా బరిలో నిలుస్తానంటూ కన్నీటి పర్యంతం
కామారెడ్డి, ఎల్లారెడ్డి, వెలుగు : కాంగ్రెస్ ప్రకటించిన సెకండ్ లిస్ట్తో ఎల్లారెడ్డిలో విభేదాలు భగ్గు మన్నాయి. పార్టీ మదన్మోహన్రావుకు టికెట్ కేటాయించడాన్ని నిరసిస్తూ టికెట్ఆశించి భంగపడ్డ పీసీసీ జనరల్ సెక్రెటరీ వడ్డేపల్లి సుభాష్రెడ్డి పార్టీకి, తన పదవికి రాజీనామా చేస్తున్నట్లు ప్రకటించారు. తనతో పాటు ఎల్లారెడ్డి నియోజకవర్గంలోని పలు మండలాల పార్టీ ప్రెసిడెంట్లు, అనుబంధ సంఘాల లీడర్లు కూడా రాజీనామా చేస్తున్నారని వెల్లడించారు. పార్టీ పెద్దలను డబ్బులతో మేనేజ్చేసి మదన్మోహన్ టికెట్ తెచ్చుకున్నారని ఆరోపించారు.
నమ్మకున్న రేవంత్రెడ్డి కూడా తనకు అన్యాయం చేశారన్నారు. రెబల్గా ఎన్నికల బరిలో నిలుస్తానని, మదన్మోహన్రావును ఓడించడమే తన లక్ష్యమన్నారు. శనివారం ఎల్లారెడ్డిలో తన అనుచరులతో ఆయన సమావేశం నిర్వహించారు. అనుచరుల మధ్య సుభాష్రెడ్డి కన్నీటి పర్యంతం కాగా, కార్యకర్తలు ఆయన్ను ఓదార్చారు.
కాంగ్రెస్ అభ్యర్థిని ఓడిస్తా..
అనుచరుల అభిప్రాయాలు తెలుసుకున్న తర్వాత వడ్డేపల్లి సుభాష్రెడ్డి మాట్లాడుతూ.. నియోజకవర్గంలో పార్టీ అభివృద్ధి కోసం ఎంతో కృషి చేశానని, గత ఎన్నికల్లో టికెట్అడిగితే ఇవ్వలేదని అప్పుడు కూడా పార్టీ గెలుపునకే పని చేశానన్నారు. జహీరాబాద్ఎంపీ అభ్యర్థిగా ఉన్న మదన్మోహన్కు మద్దతుగా ప్రచారం చేశానన్నారు. పీసీసీ ప్రెసిడెంట్తో సహా చాలా మందిని డబ్బులతో మేనేజ్ చేశానని మదన్మోహన్రావు చెప్పుకుంటున్నారని సుభాష్రెడ్డి ఆరోపించారు. కాంగ్రెస్లాబీయిస్ట్ పార్టీగా మారిందన్నారు. పార్టీ కార్యకర్తలు, ప్రజల కష్టాసుఖాల్లో తోడుగా నిలిచానని, పార్టీకి సంబంధించిన అనేక మీటింగ్లను సక్సెస్ చేశానన్నారు.
ప్రాణమున్నంత వరకు మదన్మోహన్రావును ఎమ్మెల్యేగా గెలవనీయ్యనని శపథం చేశారు. ఆయనకు ఓటేసి గెలిపిస్తే మళ్లీ బీఆర్ఎస్లో చేరుతారని, ఇదే విషయాన్ని ఇంటింటికీ వెళ్లి ప్రచారం చేస్తానన్నారు. రెబల్గా ఎన్నికల బరిలో నిలుస్తానన్నారు. గెలిచినా, ఓడినా ప్రజల సేవలో ఉంటానన్నారు. కార్యకర్తలతో చర్చించి రెండు రోజుల్లో తుది నిర్ణయం వెల్లడిస్తానని చెప్పారు. కార్యకర్తలే తన అధిష్టానవర్గమని పేర్కొన్నారు.
ఫేక్ సర్వేలు చేసిండ్రు
మదన్మోహన్ కోసం సర్వేల ఫలితాలను మార్చారని, అన్ని ఫేక్ సర్వేలేనని సుభాష్రెడ్డి కొడుకు దినేశ్రెడ్డి ఆరోపించారు. నియోజకవర్గానికి చెందిన పలువురి అభిప్రాయాలు తీసుకున్నట్లు సర్వే పత్రాలు ఉన్నాయని, ఇవన్నీ తప్పని తాను పీసీసీ ముఖ్యుల దృష్టికి కూడా తీసుకెళ్లానన్నారు.
