మక్తల్, వెలుగు : చెవుల్లో ఇయర్ఫోన్స్ పెట్టుకుని పాటలు వింటూ పట్టాలపై వాకింగ్ చేస్తుండగా రైలు ఢీకొనడంతో ఓ వ్యక్తి చెయ్యి తెగిపోయింది. ఈ ఘటన నారాయణపేట జిల్లా మక్తల్ రైల్వేస్టేషన్ సమీపంలో జరిగింది. పట్టణానికి చెందిన నవీన్ కుమార్ రెడ్డి ఉదయం వాకింగ్ కు వెళ్లాడు. రైలు పట్టాలపై ఇయిర్ ఫోన్స్ పెట్టుకొని పాటలు వింటూ నడుస్తుండగా వెనక నుంచి వచ్చిన గూడ్స్ రైలు ఢీ కొట్టింది.
ఫుల్వాల్యూమ్తో ఇయర్ ఫోన్స్లో పాటలు వింటుండడంతో రైలు శబ్దం వినిపించలేదు. దీంతో ప్రమాదం జరిగి ఎడమ చేయి తెగి పట్టాల మధ్యలో పడింది. స్థానికులు నవీన్ను మక్తల్ ప్రభుత్వ దవాఖానకు తరలించారు. అక్కడ ఫస్ట్ ఎయిడ్ చేసి మెరుగైన వైద్యం కోసం మహబూబ్ నగర్ జిల్లా దవాఖానకు తరలించారు.
