వర్ధన్నపేట, (ఐనవోలు)/ గ్రేటర్ వరంగల్/ హసన్పర్తి, వెలుగు: దవాఖానలో డాక్టర్లు ఎక్కడకు వెళ్లారని వరంగల్ కలెక్టర్ సత్యశారద ప్రశ్నించారు. బుధవారం వర్ధన్నపేట పట్టణంలోని ఏరియా ఆస్పత్రిని కలెక్టర్ ఎమ్మెల్యే కేఆర్ నాగరాజుతో కలిసి ఆకస్మిక తనిఖీ చేశారు. ఈసందర్భంగా ఆస్పత్రిలోని బయోమెట్రిక్ హాజరు వ్యవస్థను పరిశీలించారు. రిజిష్టర్లను తనిఖీ చేసి పలువురు వైద్యులు, సిబ్బంది గైర్హాజరు కావడంపై ఆగ్రహం వ్యక్తం చేశారు. నిర్లక్ష్యంగా విధులు నిర్వహించడంపై సూపరింటెండెంట్ నర్సింహస్వామిపై అసహనం వ్యక్తం చేశారు.
వెంటనే గైర్హాజరైన వారికి మెమోలు జారీ చేయాలని సంబంధిత ఆఫీసర్లను ఆదేశించారు. ఆస్పత్రిలో వార్డులు, పరిసరాలు అపరిశుభ్రంగా ఉన్నాయని, వెంటనే పారిశుధ్య నిర్వహణను మెరుగుపర్చాలని చెప్పారు. ఎమ్మెల్యే మాట్లాడుతూ నైట్ డ్యూటీ డాక్టర్లు అందుబాటులో ఉండాలని అన్నారు. ప్రజలకు మెరుగైన వైద్యం అందించడంలో రాజీ పడబోమన్నారు. అనంతరం హనుమకొండ జిల్లా ఐనవోలు మండల పరిధిలోని పలు గ్రామాలకు బస్సు సౌకర్యం ఏర్పాటు చేయడంతో కలెక్టర్, ఎమ్మెల్యే బస్సును ప్రారంభించారు.
ఈ బస్సు వరంగల్ నుంచి కొండపర్తి వరకు సేవలు అందించనున్నట్లు వారు తెలిపారు. ప్రజాపాలన– ప్రగతి ప్రణాళికలో భాగంగా వైద్యశాఖ ఆధ్వర్యంలో గ్రేటర్ వరంగల్ సీకేఎం ప్రసూతి ఆస్పత్రిలో సురక్షిత మాతృత్వ దినోత్సవాన్ని ఏర్పాటు చేయగా, కలెక్టర్ సత్యశారద, ఎమ్మెల్యే నాగరాజు హాజరై మాట్లాడారు. అనంతరం ఆస్పత్రిలో గర్భిణులకు అందుతున్న వైద్యం, ఆహారంపై పేషెంట్లను అడిగి తెలుసుకున్నారు. అనంతరం హసన్పర్తి మండలంలోని 1, 2, 55, 56, 65, 66 డివిజన్ల పరిధిలోని 76 మంది కల్యాణలక్ష్మి, షాదీముబారక్ లబ్ధిదారులకు ఎమ్మెల్యే నాగరాజు చెక్కులు పంపిణీ చేశారు.
