ఇంగ్లాండ్‌తో రెండో వన్డేకు ముందు భారత్కి బిగ్ టెన్షన్.. గిల్‌ ఆడతాడా లేదా?  

Shubman Gill: ఇంగ్లాండ్‌తో కార్డిఫ్‌ వేదికగా జరగబోయే రెండో వన్డేకు ముందు భారత క్రికెట్ జట్టుకు ఒక అద్భుతమైన శుభవార్త అందింది. తొలి వన్డేలో గాయంతో మైదానాన్ని వీడిన యువ కెప్టెన్ శుభ్‌మన్ గిల్, ప్రస్తుతం కోలుకున్నట్లు తెలుస్తుంది. జూలై 15 (బుధవారం) వచ్చిన పలు నివేదికల ప్రకారం, గిల్ గాయం తీవ్రత ఏమాత్రం ఆందోళనకరంగా లేదని, అతను రెండో వన్డేలో ఆడేందుకు సిద్ధంగా ఉన్నాడని ఇండియా క్యాంప్ నుంచి సానుకూల వార్తలు వస్తున్నాయి. అక్షర్ పటేల్ ఆల్‌రౌండ్ ప్రదర్శనతో తొలి వన్డే గెలిచిన టీమిండియా, ఇప్పుడు గిల్ రాకతో సిరీస్‌పై పట్టు సాధించేందుకు సిద్ధమైంది.

ఎడ్జ్‌బాస్టన్ వన్డేలో అసలేమైంది?: 
బర్మింగ్‌హామ్‌లోని ఎడ్జ్‌బాస్టన్ వేదికగా జరిగిన తొలి వన్డేలో శుభ్‌మన్ గిల్ అద్భుతమైన క్లాస్ ఇన్నింగ్స్ ఆడాడు. అయితే బ్యాటింగ్ చేస్తున్న సమయంలో విపరీతమైన ఎండ, డీహైడ్రేషన్ కారణంగా అతను తీవ్రమైన కండరాల నొప్పితో (Cramps) ఇబ్బంది పడ్డాడు. నొప్పితో క్రీజులో కదలలేని పరిస్థితి రావడంతో గిల్ (80 పరుగులు) రిటైర్డ్ హర్ట్‌గా స్టేడియాన్ని వీడాల్సి వచ్చింది. ఇది ఇండియన్ మేనేజ్‌మెంట్‌లో తీవ్ర ఆందోళన రేకెత్తించింది. కానీ ఆ మ్యాచ్‌లో అక్షర్ పటేల్, వాషింగ్టన్ సుందర్ అద్భుతంగా రాణించి భారత్‌కి 6 వికెట్ల తేడాతో ఘన విజయం అందించారు.

గాయంపై  రిలీఫ్.. కార్డిఫ్‌ వన్డేకు గిల్ రెడీ: 
గిల్ గాయంపై మొదట భయపడినప్పటికీ, వైద్య పరీక్షల్లో అది కేవలం కండరాల తిమ్మిరి (Cramps) మాత్రమేనని, పెద్ద గాయం కాదని తేలింది. చికిత్సకు అతను వేగంగా స్పందించాడని, కార్డిఫ్ వేదికగా ఈరోజు జరిగే మ్యాచ్ సమయానికి అతను పూర్తిగా ఫిట్ అవుతాడని తెలుస్తుంది. మ్యాచ్ ప్రారంభానికి ముందు జరిగే తుది వైద్య పరీక్షల (Fitness Assessment) క్లియరెన్స్ ఆధారంగా అతను ప్లేయింగ్ ఎలెవన్‌లో ఆడతాడో లేదో తెలుస్తుంది. మేనేజ్‌మెంట్ ఎలాంటి అనవసరమైన రిస్క్ తీసుకోకూడదని భావిస్తున్నప్పటికీ, గిల్ స్వయంగా తాను తదుపరి మ్యాచ్‌కు సిద్ధంగా ఉంటానని ధీమా వ్యక్తం చేయడం జట్టుకు బిగ్ రిలీఫ్ ఇచ్చే ముచ్చట. 

సిరీస్ విజయంపై కన్నేసిన భారత్: 
వైట్-బాల్ క్రికెట్‌లో భారత్‌కు అత్యంత స్థిరమైన ప్రదర్శన ఇస్తున్న శుభ్‌మన్ గిల్ టాప్ ఆర్డర్‌లో ఉండటం జట్టుకు కొండంత బలాన్ని ఇస్తుంది. గిల్ అందుబాటులోకి రావడంతో టీమిండియా అత్యంత బలమైన ప్లేయింగ్ XIతో బరిలోకి దిగాలని చూస్తోంది. ఈ మూడు మ్యాచ్‌ల వన్డే సిరీస్‌లో పూర్తి నియంత్రణ సాధించాలని ( 2–0 ఆధిక్యం) ఇండియా పట్టుదలగా ఉండగా, ఆతిథ్య ఇంగ్లాండ్ జట్టు తమ సొంత అభిమానుల ముందు తిరిగి పుంజుకోవాలని చూస్తుంది. రోహిత్ శర్మ, విరాట్ కోహ్లీల ఫామ్ కూడా ఫోకస్‌లో ఉండటంతో.. గిల్ రాక టీమిండియా బ్యాటింగ్ లైనప్‌కు బలం ఇవ్వనుంది.