- పుట్టపాకలో 88 శాతం.. కుంట్ల గూడెంలో 98.33 శాతం పోలింగ్
- లిమిటెడ్ ఓట్లలో.. ఐదు నుంచి 34 వరకు చిత్తు
యాదాద్రి, వెలుగు : చేనేత సంఘాల పోలింగ్ ముగిసింది. కొన్ని సంఘాల ఫలితాలు వెలువడగా, మరికొన్నింటిలో లెక్కింపు కొనసాగుతోంది. యాదాద్రి జిల్లాలో 18 చేనేత సంఘాలకు శుక్రవారం ఎన్నికలు జరిగాయి. ఈ సంఘాలలో 85 ఓట్ల నుంచి 784 వరకూ ఉండగా, మొత్తంగా 5818 ఓట్లు ఉన్నాయి. కాగా ఈ ఎన్నికల్లో అత్యల్పంగా పుట్టుపాక సంఘాలో 88 శాతం పోలింగ్ జరగగా, కుంట్ల గూడెం సంఘంలో 98.33 శాతం పోలింగ్నమోదైంది. ఓవరాల్గా 95 శాతం పోలింగ్ జరిగిందని తెలుస్తోంది.
ముగిసిన కౌంటింగ్.. ఫలితాలు వెల్లడి
మధ్యాహ్నం మూడు గంటలకే పోలింగ్ ముగిసింది. అయితే ప్రతీ ఓటరు 9 మంది డైరెక్టర్లకు ఓటు వేసినందున లెక్కింపు ఆలస్యం అవుతోంది. పోటీ చేసిన ప్రతీ అభ్యర్థి పేరు నోట్ చేసుకుంటూ ఓట్లు లెక్కిస్తూ ఎవరికి ఎన్ని ఓట్లు పోలయ్యాయో నమోదు చేస్తున్నారు. దీంతో లెక్కింపు ఆలస్యం జరిగింది. రాత్రి పొద్దుపోయే వరకూ లెక్కింపు కొనసాగింది. ఆలస్యంగా పోచంపల్లి సంఘం ఫలితం వెలువడింది. కాగా, కొన్ని సంఘాల్లో ఒక ప్యానల్ నుంచి కొందరు, మరో ప్యానల్ నుంచి మరికొందరు డైరెక్టర్లుగా గెలవడం గమనార్హం.
చెల్లని ఓట్లు..
చేనేత సంఘాల్లో ఓట్లు లిమిటెడ్గా ఉన్నా.. లెక్కింపులో చెల్లని ఓట్లు భారీగా వచ్చాయి. రూల్స్ ప్రకారం ఎంత మంది పోటీ చేసినా వారిలో 9 మందికి డైరెక్టర్లకు ఓటు వేయాల్సి ఉంటుంది. 9 మందికి మించి ఓటు వేస్తే.. ఆ ఓటు చెల్లదు. అనేక మంది ఓటర్లు 9 మంది అభ్యర్థుల కంటే ఎక్కువ మందికి ఓటు వేశారు. దీంతో ఒక్కో సంఘంలో ఆరు ఓట్ల నుంచి 30కి పైగా ఓట్లు చిత్తు అయ్యాయి. నేలపట్ల సంఘంలో 172 ఓటర్లు ఉంటే 166 మంది ఓట్లు వేశారు. వీరిలో 6 ఓట్లు చెల్లలేదు. మోత్కూరు సంఘంలో 210 ఉంటే 202 పోలయ్యాయి. ఇందులో 17 ఓట్లు చెల్లలేదు. కొన్ని సంఘాల్లో 5 నుంచి 34 ఓట్ల వరకూ చిత్తయ్యాయి.
