ఒకవైపు చల్లని చిరుజల్లులు కురుస్తుంటే.. మరోవైపు వేడి వేడిగా, కరకరలాడే నాన్ వెజ్ స్టార్టర్స్ ఎదురుగా ఉంటే ఎలా ఉంటుంది? బ్యాక్ గ్రౌండ్లో ‘ఈ జన్మమే రుచి చూడడానికి దొరికెరా...’ అంటూ మ్యూజిక్ పడాల్సిందే. ఇంకెందుకాలస్యం... మాన్సూన్ని మస్త్గా ఎంజాయ్ చేయాలంటే.. ఈ స్టార్టర్స్ తప్పకుండా ట్రై చేయండి.
దిల్కుష్ చికెన్
కావాల్సినవి :చికెన్ (బ్రెస్ట్ పీస్) - పావు కిలో
క్రీమ్ - ఐదు టేబుల్ స్పూన్లు
అల్లం, వెల్లుల్లి, పచ్చిమిర్చి పేస్ట్, మిరియాల పొడి - ఒక్కోటి టీ స్పూన్ చొప్పున
ఉప్పు - సరిపడా
వెన్న - ఒక టేబుల్ స్పూన్
చీజ్ తరుగు - ఒక కప్పు
ఎండు మిర్చి తునకలు - ఒక టీస్పూన్
తయారీ :చికెన్ బ్రెస్ట్ పీస్ని సన్నటి పొరలుగా కట్ చేయాలి. ఆ తరువాత వాటిని చపాతీ కర్రతో నెమ్మదిగా కొట్టాలి. ఒక గిన్నెలో క్రీమ్, అల్లం, వెల్లుల్లి, పచ్చిమిర్చి పేస్ట్, మిరియాల పొడి, ఉప్పు వేసి బాగా కలపాలి. ఆ మిశ్రమాన్ని కట్ చేసిన చికెన్ పొరలకు పూసి, ఇరవై నిమిషాలు నానబెట్టాలి. ఆ తర్వాత అందులో చీజ్, పచ్చిమిర్చి తరుగు పెట్టి రోల్ చేయాలి. ఊడిపోకుండా రోల్మీద టూత్ పిక్ గుచ్చాలి. పెనం మీద వెన్న వేడి చేసి తయారుచేసిన చికెన్ రోల్స్ని కాల్చాలి. టూత్ పిక్ తీసేసి, రెండోవైపు కూడా కాల్చాలి. తరువాత పైన చీజ్ తరుగు చల్లి మూత పెట్టాలి. ఐదు నిమిషాలు ఉడికిస్తే దిల్కుష్ చేసే చికెన్ స్టార్టర్ రెడీ.
ఫిష్ కోలివడ
కావాల్సినవి :చేప ముక్కలు (ముళ్లు లేనివి) - పావు కిలో
అల్లం వెల్లుల్లి పేస్ట్, నిమ్మరసం - ఒక్కో టేబుల్ స్పూన్ చొప్పున
కారం - రెండు టేబుల్ స్పూన్లు
జీలకర్ర పొడి, ఉప్పు - ఒక్కోటి అర టీ స్పూన్ చొప్పున
పసుపు, వాము - ఒక్కోటి పావు టీ స్పూన్ చొప్పున
శనగపిండి, బియ్యప్పిండి - ఒక్కోటి రెండు టీస్పూన్ల చొప్పున
బేకింగ్ సోడా, చాట్ మసాలా - చిటికెడు
నూనె - సరిపడా
తయారీ :ఒక గిన్నెలో చేప ముక్కలు, అల్లం వెల్లుల్లి పేస్ట్, నిమ్మరసం, కారం, జీలకర్ర పొడి, ఉప్పు, పసుపు వేసి కలపాలి. పావుగంట తర్వాత అందులో శనగపిండి, బియ్యప్పిండి, బేకింగ్ సోడా వేసి కలపాలి. ఆ తర్వాత నూనె వేడి చేసి అందులో చేప ముక్కల్ని ఐదు నిమిషాలు వేగించాలి. చివరిగా చాట్ మసాలా, కొంచెం కారం చల్లి తింటే ఆ మజానే వేరు.
క్రిస్పీ మటన్
కావాల్సినవి :మటన్ (బోన్లెస్) - అరకిలో
నీళ్లు, నూనె - సరిపడా
పసుపు, ఉప్పు, అల్లం వెల్లుల్లి పేస్ట్ - ఒక్కోటి అర టీస్పూన్ చొప్పున
ధనియాల పొడి, జీలకర్ర పొడి,
చాట్ మసాలా, గరం మసాలా - ఒక్కోటి ఒక్కో టీస్పూన్ చొప్పున
కారం, ఉప్పు, పసుపు, ధనియాలు - ఒక్కోటి అర టీస్పూన్ చొప్పున
శనగ పిండి, బియ్యప్పిండి, పెరుగు - ఒక్కోటి రెండు టేబుల్ స్పూన్లు చొప్పున, పచ్చిమిర్చి - రెండు
కొత్తిమీర తరుగు - అర కప్పు
నిమ్మరసం, అల్లం వెల్లుల్లి పేస్ట్ - ఒక్కో టీస్పూన్ చొప్పున
తయారీ :కుక్కర్లో మటన్, పసుపు, ఉప్పు, అల్లం వెల్లుల్లి పేస్ట్ వేసి నీళ్లు పోయాలి. కుక్కర్ మూత పెట్టి ఒక విజిల్ వచ్చేవరకు ఉడికించాలి. ప్రెజర్ పోయాక మూత తీసి విడిగా మరికాసేపు ఉడికించాలి. ఆ తర్వాత అందులో ధనియాల పొడి, జీలకర్ర పొడి, చాట్ మసాలా, గరం మసాలా, కారం, ఉప్పు, పసుపు, ధనియాలు, పచ్చిమిర్చి, కొత్తిమీర తరుగు, నిమ్మరసం, పెరుగు, అల్లం వెల్లుల్లి పేస్ట్ వేసి కలపాలి. పాన్లో నూనె వేడి చేయాలి. అందులో మటన్ ముక్కల్ని వేగించాలి.
ప్రాన్ స్టిక్స్
కావాల్సినవి :రొయ్యలు - 350 గ్రాములు
నిమ్మరసం - అర టీస్పూన్
చాట్ మసాలా, గరం మసాలా,
పసుపు, అల్లం వెల్లుల్లి పేస్ట్, మిరియాల పొడి -
ఒక్కోటి అర టేబుల్ స్పూన్ చొప్పున
కార్న్ ఫ్లోర్, మైదా - ఒక్కోటి రెండు టేబుల్ స్పూన్ల చొప్పున, కోడిగుడ్డు - ఒకటి
నూనె, ఉప్పు, బ్రెడ్ క్రంబ్స్, కార్న్ ఫ్లేక్స్ - సరిపడా
తయారీ : రొయ్యల్ని శుభ్రంగా కడిగి గిన్నెలో వేయాలి. అందులో నిమ్మరసం, ఉప్పు, చాట్ మసాలా, గరం మసాలా, కారం, అల్లం వెల్లుల్లి పేస్ట్, మిరియాల పొడి వేసి కలపాలి. పది నిమిషాల తర్వాత పసుపు, కార్న్ ఫ్లోర్, మైదా, కోడిగుడ్డు కూడా వేసి బాగా కలపాలి. వాటిని పుల్లలకు గుచ్చి, బ్రెడ్ క్రంబ్స్, కార్న్ ఫ్లేక్స్ మిశ్రమంలో దొర్లించాలి. ఆ తర్వాత వాటిని వేడి నూనెలో వేసి వేగించాలి.
బటర్ గార్లిక్ ఫిష్
కావాల్సినవి :చేప ముక్కలు (ముళ్లు లేనివి) – ఆరు,
ఉప్పు – సరిపడా
మిరియాల పొడి – ఒక టీస్పూన్
వెన్న – నాలుగు టేబుల్ స్పూన్లు
వెల్లుల్లి తరుగు – రెండు టేబుల్ స్పూన్లు
కొత్తిమీర – ఒక టేబుల్ స్పూన్
ఎండు మిర్చి తునకలు – ఒక టీస్పూన్, మైదా – అర కప్పు
నిమ్మరసం – రెండు టీస్పూన్లు
నూనె – రెండు టేబుల్ స్పూన్లు
తయారీ : ఒక గిన్నెలో చేపముక్కలు, మిరియాల పొడి, ఉప్పు వేసి కలపాలి. పావుగంట తర్వాత మైదా పిండిలో ఒక్కో చేప ముక్కని దొర్లించాలి. పాన్లో నూనె వేడి చేయాలి. తరువాత చేప ముక్కల్ని వేసి మూడు నిమిషాలు వేగించాలి. ఆ తర్వాత మరో పాన్లో వెన్న వేడి చేసి వెల్లుల్లి తరుగు వేగించాలి. అందులో మిరియాల పొడి, రెండు టీస్పూన్ల మైదా, నిమ్మరసం, ఎండు మిర్చి తునకలు, కొత్తిమీర వేసి కలపాలి. ఆ మిశ్రమాన్ని చేప ముక్కలపై పోయాలి.
