నాగర్ కర్నూల్ టౌన్, వెలుగు: బోగస్ పత్రాలతో ఆసుపత్రులు నడిపితే క్రిమినల్ కేసులు పెడతామని కలెక్టర్ బదావత్ సంతోష్ స్పష్టం చేశారు. బుధవారం కలెక్టరేట్ లో సమావేశం నిర్వహించారు. కొత్తగా వచ్చిన 21 ఆసుపత్రుల పత్రాలను పరిశీలించారా? అని డీఎంహెచ్వోను అడిగి తెలుసుకున్నారు.
జిల్లాలో 72 ప్రైవేట్ ఆసుపత్రులకు అనుమతి ఉందని, ప్రైవేట్ ఆసుపత్రులు, డయాగ్నొస్టిక్, స్కానింగ్ సెంటర్లు నిబంధనలు పాటించాలన్నారు. జిల్లాలోని ప్రైవేట్ ఆసుపత్రులను తనిఖీలు చేస్తానని, నిబంధనలు పాటించకుంటే కఠిన చర్యలు తప్పవని హెచ్చరించారు. లింగ నిర్ధారణ పరీక్షలు చేస్తే చర్యలు తీసుకోవాలని ఆదేశించారు. అడిషనల్ కలెక్టర్ దేవసహాయం, అడిషనల్ ఎస్పీ రామేశ్వర్, డీఎంహెచ్ వో స్వరాజ్యలక్ష్మి, ప్రైవేట్ ఆసుపత్రుల సంఘం జిల్లా అధ్యక్షుడు చెన్నయ్య పాల్గొన్నారు.
