- ఖమ్మం రేంజ్ లో ఆర్నెళ్లలో 1,680 ఎన్వోసీలు, రూ.16 లక్షల లావాదేవీలు..
- ఆర్నెళ్ల కింద మామిడి తోట నరికేందుకు రైతు దరఖాస్తు
- ఆ సర్వే నెంబర్, రైతు వివరాలతో 24 ఎన్వోసీలు మంజూరు
- అక్రమాలు జరిగిన తీరుపై సీసీఎఫ్ భీమా నాయక్ ఎంక్వైరీ
ఖమ్మం/ ఖమ్మం టౌన్, వెలుగు: ఖమ్మం జిల్లా అటవీ శాఖలో ఇంటి దొంగల అక్రమాలు తవ్విన కొద్దీ బయటపడుతున్నాయి. దాదాపు ఆర్నెళ్ల కింద చింతకాని మండలానికి చెందిన కిలారు వేణు గోపాల్ అనే రైతు తన మామిడి తోటను నరికేసేందుకు నో అబ్జెక్షన్ సర్టిఫికెట్ తీసుకున్నారు. ఆ సమయంలో రైతు సమర్పించిన ఆధార్ కార్డు, పాన్ కార్డు, పట్టాదారు పాస్ బుక్ వివరాలతో అదే పేరు మీద అక్రమార్కులు ఫేక్ ఎన్వోసీలను తీసుకున్నారు.
ఆన్ లైన్ లో వేప, సీమ చింత, సర్కారు తుమ్మ సహా నిషేధం లేని కలప తరలించేందుకు ఎన్వోసీ కోసం దరఖాస్తు చేసుకుంటే, ఫారెస్ట్ బీట్ ఆఫీసర్ క్షేత్ర స్థాయిలో పరిశీలించి ఓకే చేస్తారు. సెక్షన్ ఆఫీసర్ పర్యవేక్షణ తర్వాత రేంజ్ ఆఫీసర్లాగిన్ ద్వారా అనుమతులిస్తారు. ఇలా 44 రకాల చెట్ల జాతులకు నేషనల్ ట్రాన్సిట్ పాస్సిస్టమ్(ఎన్టీపీఎస్) ద్వారా ఎన్వోసీ కోసం ఆన్ లైన్ లో దరఖాస్తు చేసుకోవచ్చు.
కానీ, ఒకే రైతు, ఒకే సర్వే నెంబర్ వివరాలతో గత ఆరు నెలల్లో 24 ఎన్వోసీలు తీసుకున్నట్టు ఆఫీసర్ల ఎంక్వైరీలో తాజాగా గుర్తించారు. క్షేత్ర స్థాయిలో తనిఖీలు చేయకుండానే, ఆఫీస్ లోనే సొంత ల్యాప్ టాప్ ద్వారా అనుమతులిచ్చారని తేల్చారు. అవే ఎన్వోసీలను సర్కారు తుమ్మ స్థానంలో సండ్ర (ఖేర్) గా ట్యాంపరింగ్ చేసి సండ్ర కలపను ఇతర రాష్ట్రాలకు తరలించారు.
ఈ అక్రమ వ్యవహారాలు వెలుగులోకి రావడంతో వరంగల్ సర్కిల్ చీఫ్ కన్జర్వేటివ్ ఆఫీసర్ భీమా నాయక్ మంగళవారం ఖమ్మం వచ్చారు. జిల్లాలోని రేంజర్లతో పాటు అధికారులతో సమావేశమై వివరాలు తెలుసుకున్నారు.
ఏడాదిలో ఇన్ని ఎన్వోసీలా?
ఖమ్మం ఫారెస్ట్ రేంజ్ పరిధిలో చింతకాని, ఈర్లపూడి, గుబ్బగుర్తి సెక్షన్లున్నాయి. ఏజన్సీ ఏరియా కారేపల్లి రేంజ్ నుంచి రోజుకు సుమారు 5 నుంచి 10 ట్రాక్టర్ల వరకు కలపతో ఖమ్మం వస్తుంటాయి. వీటికి ఎన్ఓసీలను ఖమ్మం రేంజర్ పర్యవేక్షణలో బీట్ ఆఫీసర్లు జారీ చేస్తుంటారు. డిపార్ట్ మెంట్ కు సంబంధం లేని రవికుమార్ అనే వ్యక్తి పేరు మీద బ్యాంక్ అకౌంట్ తీసి, అతడి పేరు మీద ఉన్న ఫోన్ పే, గూగుల్ పే అకౌంట్ల ద్వారా డబ్బుల ట్రాన్సాక్షన్లను చేస్తున్నారు.
ఇలా గత ఆరు నెలల్లో రూ.16లక్షల ట్రాన్సక్షన్లు జరిగినట్లు తెలిసింది. ఎన్వోసీలకు సంబంధించిన అక్రమ సంపాదనలో ఎఫ్ఆర్ఓకు రూ.1,500, సెక్షన్ ఆఫీసర్ కు రూ.వెయ్యి, పర్మిట్ తయారీకి మరో రూ.వెయ్యి, ఇవి కాకుండా కర్ర నరికిన కారేపల్లి రేంజ్ సిబ్బందికి రూ.2 వేలు చొప్పున అమ్యామ్యాలు ముట్ట చెబుతున్నట్లు సమాచారం. దీనికి సంబంధించిన ఆన్ లైన్ మనీ ట్రాన్సాక్షన్లను ఇప్పటికే జిల్లా అధికారులు రికవరీ చేసిన సెల్ ఫోన్ లో గుర్తించినట్టు తెలుస్తోంది.
ప్రస్తుతం ఆ సెల్ ఫోన్ ను ఫోరెన్సిక్ ఆడిట్ కోసం హైదరాబాద్ పంపించినట్టు ఆఫీసర్లు చెబుతున్నారు. గతేడాది అక్టోబర్ లో ఖమ్మం బదిలీపై వచ్చిన ఎఫ్ఆర్వో ఒకరు, గత ఆరు నెలలోనే దాదాపు 1,680 ఎన్వోసీలను మంజూరు చేసినట్టు సమాచారం. దీంతో వాటిపై ఇప్పుడు టాస్క్ ఫోర్స్ ఆఫీసర్లు ఫోకస్ పెట్టారు. ఎన్వోసీల ట్యాంపరింగ్ జరిగిందా, ఎక్కడైనా అక్రమాలు జరిగాయా.. అనే కోణంలో దృష్టిసారించినట్టుతెలుస్తోంది.
ఒకట్రెండు చెక్ పోస్టులతో కట్టడి ఎలా?
ఇతర జిల్లాల నుంచి ఖమ్మం నగరానికి వచ్చేందుకు ఆరు ప్రధాన రహదారులుండగా, రెండు చోట్ల మాత్రమే ఫారెస్ట్ చెక్ పోస్టులున్నాయి. పాలేరుతో పాటు ఖమ్మం నగరంలోని ఎన్టీఆర్ సర్కిల్ లో చెక్ పోస్టు ఉంది. ఈ రెండు చెక్ పోస్టులు దాదాపు 30 ఏళ్ల కింద ఏర్పాటు చేయగా, ఆ తర్వాత కొత్తగా చాలా రాష్ట్ర, జాతీయ రహదారులు ఏర్పాటయ్యాయి.
ఈ రోడ్ల వెంట కలప అక్రమ రవాణాను అరికట్టే, తనిఖీ చేసే చెక్ పోస్టుల వ్యవస్థ సరిపోవడం లేదు. కొత్తగా అన్ని రోడ్లపై చెక్ పోస్టుల ఏర్పాటు చేసి, మూడు షిఫ్టుల్లో అక్కడ డ్యూటీలో ఉండాలంటే తగినంత మంది సిబ్బంది లేరు. కొత్తగా రిక్రూట్ మెంట్లు చేసి, అదనపు సిబ్బందిని కేటాయిస్తే తప్పించి అక్రమ కలప రవాణాకు చెక్ పెట్టే పరిస్థితి కనిపించడం లేదు.
మరోవైపు ఫేక్ నో అబ్జెక్షన్సర్టిఫికెట్ల జారీ వ్యవహారంపై ఎంక్వైరీ జరుగుతుండడంతో అందులో భాగస్వామ్యం ఉన్న అధికారులు, సిబ్బందితో పాటు ఆ ఎన్వోసీలను తీసుకొని సరుకు రవాణా చేసిన టింబర్డిపోల యజమానుల్లో కలకలం కొనసాగుతోంది. ఫారెస్ట్ టాస్క్ ఫోర్స్ అధికారులతో పాటు విజిలెన్స్ఆఫీసర్లు కూడా ఎన్వోసీల తనిఖీ కోసం టింబర్ డిపోలకు వస్తారని కొందరు భయపడుతున్నారు. అయితే తప్పుడు ఎన్వోసీలు ఉన్న వారు వెంటనే వాటిని చించివేయాలంటూ ఓ ఆఫీసర్ టింబర్ డిపోల యజమానులకు ఫోన్ చేసి చెబుతున్నట్టు సమాచారం.
చెక్ పోస్టుల వ్యవస్థను పటిష్టం చేస్తున్నాం
గతంలో ఏర్పాటు చేసిన చెక్ పోస్టులే ఇప్పటికీ ఉన్నాయి. బైపాస్ రోడ్డు, కాల్వొడ్డు సహా అనేక మార్గాల్లో ఖమ్మం వచ్చేందుకు అవకాశాలు, రోడ్డు మార్గాలు పెరిగాయి. ఉన్న సిబ్బందిని వినియోగించుకుంటూ చెక్ పోస్టులను పటిష్టం చేస్తున్నాం. మన రాష్ట్రంలో రూ.500 చలానా ఉండగా, ఆంధ్రాలో ఎన్వోసీ కోసం రూ.10 మాత్రమే ఫీజు ఉంది.
దీంతో అక్కడి నుంచి మనకు కలప అక్రమ రవాణా జరగకుండా మధిర దగ్గర బోర్డర్ చెక్ పోస్టు ఏర్పాటు చేయాలని భావిస్తున్నాం. పాలేరు దగ్గర పాత రోడ్డుపై ఉన్న చెక్ పోస్టు ను కొత్త రూట్ కు మార్చేందుకు ప్రతిపాదనలు పంపించాం. ఇక ఎన్టీపీఎస్ లో ఆన్ లైన్ ఎన్వోసీలో ఉన్న లోపాలపై కేంద్రానికి ఉన్నతాధికారుల నివేదిక పంపిస్తున్నాం. - సిద్ధార్థ విక్రమ్ సింగ్, జిల్లా ఫారెస్ట్ ఆఫీసర్, ఖమ్మం
