- అమరవీరులకు సంతాప తీర్మానం ప్రవేశపెట్టిన మేయర్
- సమావేశాన్ని బహిష్కరించిన కాంగ్రెస్, బీజేపీ కార్పొరేటర్లు
హైదరాబాద్, వెలుగు: జీహెచ్ఎంసీ కౌన్సిల్ సమావేశం కేవలం ఎనిమిది నిమిషాలు మాత్రమే సాగింది. మధ్యాహ్నం 12.30 గంటలకు సమావేశం ప్రారంభమని సభ్యులకు సమాచారం ఇచ్చినప్పటికీ 1.40కు ప్రారంభమైంది. ఆ వెంటనే అమరవీరుల త్యాగాలను స్మరించుకుంటూ సభ్యులు రెండు నిమిషాల పాటు మౌనం పాటించి నివాళులర్పించారు. ఈ సందర్భంగా మేయర్ ప్రసంగిస్తూ.. తెలంగాణ రాష్ట్రం ఆవిర్భావం ఎందరో అమరవీరుల స్వప్నం, ప్రజల చిరకాల కోరిక అన్నారు. అమరవీరులకు సంతాప తీర్మానం ప్రవేశపెట్టిన మేయర్ ఆ తర్వాత వాయిదా వేశారు. 8 నిమిషాల్లోనే సమావేశం వాయిదా పడింది. కౌన్సిల్ మీటింగ్లో బీఆర్ఎస్, ఎంఐఎం కార్పొరేటర్లతోపాటు, జీహెచ్ఎంసీ కమిషనర్ డీఎస్ లోకేశ్ కుమార్, ఈవీడీఎం డైరెక్టర్ ప్రకాశ్రెడ్డి, అడిషనల్ కమిషనర్ ప్రియాంక ఆల, జోనల్ కమిషనర్లు మమత, శ్రీనివాస్, పంకజ, శ్రీనివాస్ రెడ్డి, శంకరయ్య, సీసీపీ దేవేందర్ రెడ్డి తదితరులు పాల్గొన్నారు.
అయితే, అనుకున్నట్లుగానే ఈ కౌన్సిల్ మీటింగ్ను బీజేపీ, కాంగ్రెస్ కార్పొరేటర్లు బహిష్కరించారు. దశాబ్ది ఉత్సవాల ముగింపులో భాగంగా అమరవీరులకు సంతాపం తెలపడంతోపాటు సీఎం కేసీఆర్ను పొగిడారు. కేసీఆర్ని పొగిడేందుకు కాకుండా.. ప్రజాసమస్యలపై చర్చించేందుకు సమావేశాన్ని నిర్వహించి ఉంటే బాగుండేదని బీజేపీ, కాంగ్రెస్కార్పొరేటర్లు పేర్కొన్నారు. ప్రజా సమస్యల చర్చ కోసం కాకుండా సీఎంను పొగిడేందుకు కౌన్సిల్ నిర్వహించడం ఏంటని ప్రశ్నించారు. ఈ నేపథ్యంలోనే సమావేశాన్ని బహిష్కరిస్తున్నట్లు ప్రకటించారు.
