- వైరల్గా మారిన ఆడియో రికార్డ్
మేడిపల్లి, వెలుగు: ఓ డివిజన్ కార్పొరేటర్ భర్త వర్క్ ఇన్ స్పెక్టర్ను ఫోన్లో బూతులు తిట్టిన ఘటన బోడుప్పల్ కార్పొరేషన్ పరిధిలో జరిగింది. వివరాల్లోకి వెళితే.. కార్పొరేషన్ పరిధిలో ఇంజనీరింగ్ విభాగంలో పనిచేసే వర్క్ ఇన్ స్పెక్టర్ కు.. మంగళవారం ఓ డివిజన్ కార్పొరేటర్ భర్త ఫోన్ చేసి మాట్లాడాడు. తన డివిజన్లో కాకుండా 16వ డివిజన్లో రోడ్డు పనులు ఎలా పూర్తి చేస్తావంటూ అతడిని బూతులు తిట్టాడు. ‘నీ సంగతి చెప్తా.. దమ్ముంటే వాయిస్ రికార్డ్ చేసుకో’ అంటూ బెదిరించాడు. ఇది ప్రస్తుతం సోషల్ మీడియాలో వైరల్గా మారింది. కార్పొరేటర్ భర్త పై కేసు ఫైల్ చేయడంతో పాటు కార్పొరేటర్ను పదవి నుంచి తొలగించే వరకు ఉద్యమిస్తామని మున్సిపల్ ఉద్యోగుల సంఘం నేత కోట వెంకటేశ్వర్లు హెచ్చరించారు.
